SA PAKIWARI ko ay moro-moro lang
itong pagkapasa’t pagdeklara nilang
umano ay ‘sufficient in forms and substance’
ang ‘impeachment complaint’ na isinampa riyan
(Sa Kongreso) laban kay Pangulong PNoy,
sanhi na rin nitong tama’t naisulong,
pero pagdating sa loob, ilan doon
ang maasahang sa ‘impeachment’ papabor?
(Yan kumbaga sa isang ipapa-ospital
ay baka hanggang sa naipasok lamang
kundi man ika nga ay ‘dead on arrival’
na yan bago mai-akyat sa hagdanan)
Bunsod na rin nitong kakampi n’yan halos
ang karamihan sa umano’y binusog
Sa PDAF at DAP na sabi’y nakurakot
ng mga yan dahil sa pekeng NGOs
Ni Janet Napoles, na itinuturong
utak ng lahat na at kung papaanong
nakakulimbat ng daang-daang milyon
mula sa DBM kung di nagkaroon
Ng sabuwatan sa pagitan nina Abad
at Miss Napoles kung yan ay walang basbas
ng Palasyo para makapagpalabas
ng napakalaking halagang nasikwat
Na ipinamudmod daw ng Malakanyang
sa Congress at Senate upang makuha niyan
ang suporta nila para ipatanggal
si Justice Corona sa ‘Highest Tribunal.’
Sa puntong yan saan sa akala natin
ang ‘impeachment complaint’ posibleng pulutin
kung di sa kangkungan ngayong itong ating
mga mambabatas sa kanya makiling?
At maging ang kanyang ambisyong habaan
ang ‘terms of offi ce’ nito sa Malakanyang,
Na aniya’y di siya ang may kagustuhan,
kundi ang kanyang ‘Boss’ o ang taongbayan.
Yan sa ganang aming sariling opinyon
ay palusot lamang ni Pangulong PNoy
upang palabasing taongbayan itong
nagnanais bigyan siya ng ‘term extension’
Sa pamamagitan nga ng pag-amyenda
ng mga Solons sa Batas Republika,
na kung saan limitado sa anim na
taon lang dapat ang ‘term of office’ niya;
O ng sino pa mang umupong Pangulo
mula ipairal ang batas na ito,
maliban na lang kung igiit nga nito
ang ‘charter change’ para muling makatakbo
Na kabaligtaran nitong sinasabi
ni PNoy, na aniya’y taongbayan kasi
ang may gusto para maging Presidente
siya ng isa pang ‘term of office’ bale;
Na lubhang malayo sa katotohanan,
dahil kung totoong sa panunungkulan
niya ay ‘satisfi ed’ itong mamamayan,
ano’t marami ang di nasisiyahan?
Dala nang kawalan ng isang salita
at sa Konstitusyon ay paglabag kusa?
Kung saan pati na ‘highest court’ ng bansa
di niya sinusunod at tinutuligsa?
Yan ba ang lider na nanaisin baga
na muling maupo ng ‘constituents’ niya?
Sa ganang akin ay maglubay na siya,
sa kahihirit ng isang termino pa;
At alalahanin ang yumaong ama,
na kabaligtaran ng ngayo’y gawa niya;
Mas makabubuti ang mamahinga na,
bago bulyawan siyang tama na, sobra na!
