KING PANAUN ngeni a nung nu’ ing yatu
Bugbug ne king sakit a miyaliwang bisyu,
Ing nanu mang bage atiyu king tau
Mabilis lumipas, malaguang magbayu;
Ugaling minuna a sadiang mapinu
Ala na ngeni iti nu’ka man painturu,
Ing napun at ngeni nung pakasurian mu
Mapikandayu na king ugaling bayu.
Metung a malino ugali king napun
A ngeni anti nang mebaldug king aun,
Ya’ytang e pin wari karas ning Orasyun
Ati’ tana bale – nu’ta man linuyun?
Arapan ning altar karin ta’ daraun
Itang panalangin para king Miniaklung;
Nanu’t mekalinguan na ing tipun-tipun
A pamagrosario king bayung panaun?
Kaibat ning pangading milalu kakaba
Mamanyiklaud tamu, kang Tatang, kang Inda;
Kanita – kapatad a matua mung bagia,
Sisiklauran da la, igagalang kusa;
Pati e ra nanu-balang mang bitasa
Yutus da lang siklod basta matua ya sa’;
Ngeni… mitata no’ ampon minda-Inda,
Nanung mayayakit? Siklaud ya ing bisa!
Ala na yan ngeni at mitda nang ganap
King kaisipan da reting anak-anak;
Kase, agiang matua ne rugung kukupak
E ro sisiklauran agiang nanung oras.
(Nino mo pin karen ing Apu rang maklak
A pagsikasuan dang lelen pa king papag?
King panaun a iti tutu nang malagad
Ing makakit tamung magalang a anak)
Nung kanitang aldo lubus mayayakit
Karing mikapatad itang malasakit,
Ngeni king uli ring keng pamilya sampid
Mikakanlaut la’t mipapaginakit;
Ante king pamilya ing matibe lubid
A dapat sang’ maging gabe king matulid?
Nanu’t anti ta’ na yatang pepayraig
King e ustu misan uli ra ding sabit?
Ala na, mete nang mistula king tau
Ing ugaling sakdal a tiru ning Guinu;
Ing sadiang kayapan a mibie king yatu
Pengibabawan na ning matsurang bisyu
At ning kasakiman nung inia marahil
Ing ugaling mayap anti nang mebating,
At keta anti na mu namang mipimpin
Karing aliwa ing bage mangasanting.
Merimla ing lugud a matibe bagting
King balang pamilya – at anti na waring
Mipaid king bagul ning magyelung angin
Ing lugud a ngeni miyalilan pagbitkil?
Iti ya na kayang king Banal a Libru
Ing masasabi ken king y Jesukristo
E na luat, magbalik ne ping pasibayu
Ban ukuman iting mabilug a yatu;
Tanda king ing balang salang depat tamu,
Dewakan yang maging dalan king Impyernu;
At idala Na no’ man king Paraisu,
Ding meging sakdal ken at banal a tau?!
