Kung dati marami ang takot pumunta
O dumaan man lang sa Luis, Pampanga
Ngayon kahit anong oras ka magpunta
Ay wala ng taong sa iyo sisita
Pagkat ang noon ay pinangingilagan
At anila’y isang delikadong lugar,
Dala ng ya’y naging kuta ng kaaway
Ng pamahalaan sa nagdaang araw
Ay lubhang malaki na ang pinag-iba
Kaysa sa dati na kung hindi ka kilala
Ay malamang na mapagkamalan ka pa
Na isang ‘informer’ at/o kaya espiya.
Partikular noong ang kilusan laban
Sa ating gobyerno ay kasalukuyang
Nasa kainitan, kaya pupuede kang
Mapahamak kahit mapadaan ka lang.
Pero ngayon, itong bayan ng San Luis
Ay isang lugar na pinaka-tahimik
Sa dakong silangan ng Pampanga province,
Pati sa ibang bayan pa nitong karatig.
Mapa’gabi walang dapat ikatakot
Itong sa alin mang baryo ka mag-ikot
Dahilan na rin sa may ilaw ang halos
Lahat na ng dako ng lugar na sakop.
Bukas magdamag d’yan ang ilaw sa poste,
Partikular sa may gawi ng palengke,
Munisipyo, saka malapit sa Parke;
Pagkat masinop ang kanilang Alkalde
Na si Honorable Asiong Macapagal,
Na kwenta ‘co-host’ ng bigay na parangal
Kay Taruc ng ‘local government official,’
Academe, media at iba pang samahan
Ng makata’t manunulat sa Pampanga,
Na sina Amado Higante at saka
Ang magpinsang makatang Dolly’t Sarah,
Kasama ang ilang myembro ng AGTACA
Na bumigkas riyan ng inihandang tula
Para kay Taruc sa pagiging Dakila
Ng dating Supremo sa mata ng madla,
Na ginampanan ng tanyag na makata.
Na sina Ms. Ofrecina dela Pena
At Frank Guinto ng Macabebe, Pampanga;
(Kung saan ang ‘co-host’ ni Mayor, kasama
Ang Center of Kapampangan Studies pa.)
Si Fray Francis Musni ang bale ‘program host’
Sa palatuntunang dito idinaos,
Na ang ginamit ay English at Tagalog
Liban sa sariling atin na siyang tampok
At ang mabait at butihing Governor,
Ng Pampanga’y isa sa V.I.P. roon,
Na nagsalita at sa San Luis nangakong
Gagawin ang anumang maitutulong.
(Na inaasahan nating matutupad
Dahil ano pa mang sinabi’y kaagad
Inaaksyunan ni Gob nang walang liwag
Para sa ikabubuti nating lahat)
(At kabilang sa ilang importanteng tao
Na nagsalita ay si Juan Rimpy Pablo,
Na hinangaan ko sa ‘fluency’ nito
Sa Kapampangan o ‘Sisuang Amano!’
Kaya marapat lang na ating puriin
Si Congressman Rimpy sa husay at galing
Niya sa pagbigkas sa sariling atin,
Na pupuedeng maipagmalaki mandin!)
