Ding batas para king tau
A gewa ring tau mismu,
Ya naman ing king calulu
At ning masalapi canu;
Iti ya ing cabaluan cu,
Keca wari macananu?
Ing batas para king mangmang,
King megaral yamu naman?
Wa, agpang king catuliran
Ning matinu pilubluban;
Dapot e ta’ atawaran
Tabingi ya kemarailan.
Sigun king patas a suri
Calulu king cayang bili,
Caras caring masalapi
Matulid na talangkibi,
Uling ta’re asasali
Ing justcia agiang mali.
At pablasang ding biasa mu
King bage yan ding mibubu,
Keta uling e ta’ balu
Papalto ra king yang tutu;
Inia nanu’t e manabu
Ing Timbangan ketang liku?
Catutuan gewa re’ing batas
King timbangan a parehas,
Nitang matang macatacap
At maki-Espada gamat;
Dapot baket ing mapilac
Mangibabo ya madalas?
Sablang batas a megawa
Lalam ning timawang bansa,
Deti e la pang-maluca
O king matas a upaya;
Uling nung e la pang-malda
Mapa’ng ALA NANG BITASA!
