Ngayong ang butihing Gobernador mismo
Ng Pampanga ang kay Oca nag-endorso
Sa pagka-Congressman ng kanyang distrito,
Nakatitiyak na siya ng panalo.
Laban kay incumbent Congressman Gonzales
(Na kabilang sa ‘pet’ at kasanggang dikit
Ni Ginang Arroyo – pero nang maipit
Sa intriga si Mam, na nagmalasakit
At tunay naman ding sumuportang lubos
Upang ang pangarap ni Dong ay maabot,
Sukat bang iwanan sa gitna ng laot
Nang ang bangka nitong isa ay palubog?
At iniligtas n’yan ang kanyang sarili
Sa inaakalang pagkalunod pati
Kapag ang bangka ng dating Presidente
Ay di tinantanan ng bagyong matindi!)
Kaya hayan – kahit magkasangga dapat
Sila ni ‘Nanay’ ay si Oca at lahat
Ang inindorso at kwenta itinaas
Ni Gob ang kamay ng dating mambabatas
Upang maihalal bilang Kinatawan
Sa 3rd District nitong ating lalawigan
Bagama’t si Oca ay isang Liberal
At kasangga bale ni Among sa laban
Pero ano’t si Oca ang inindorso
Ni ‘Nanay Baby’ at hindi si Aurelio
Kung hindi higit na may tiwala ito
Sa kakayahan ng mahusay na tao?
Ya’y dahil na rin sa higit mahalaga
Sa butihing gobernador ng Pampanga
Ang makapagsilbi sa lahat-lahat na
Ng walang anumang kulay pulitika.
At dahil likas kay ‘Nanay’ ang pagiging
Makatuwiran sa pagtupad ng tungkulin,
Kapartido’t hindi pareho ang tingin
Ni Gob pagdating sa marapat harapin
At ikabubuti ng serbisyong bayan
Ng ni wala naman ding kinikilingan,
Dala na rin nitong pagkapantay-pantay
Ng kanyang paglingap sa nasasakupan.
At bunsod tiyak ng lubos na tiwala
Ni Gob sa kakayahan ni Mayor Oca,
Di man katiket ay siyang pinili nga
At hayagang ikinampanya sa madla.
At di alintana kung ya’y matatawag
Na ‘unfair’ para sa kasangga niya dapat,
Sapagkat kung sino ang karapat-dapat
Para kay Gob ang siyang matimbang sa lahat.
Anong masama kung ibang partido man
Ang hiningi niyang ating suportahan,
Kung higit sa lahat ay batid nga niyang
Si Oca ang dapat na maging Congressman?
Subok na kasi at taga sa panahon
Kumbaga sa isang klaseng punongkahoy
Ang tibay ng paninindigan ni Mayor
Kaya’t suportado siya ni Governor.
Isa pa, parehong serbisyo matapat
Sa bayan ang natatangi nilang hangad,
Kaya kapag yan ay parehong pinalad,
Ang buong Pampanga pihong papalakpak!
