BALEN mipakde ka kakung kukulait
Kekang pakasuryan ing kekang akakit,
Balang katlung banwa dakal lang lalapit
Ngara, pagsilbian da ing bili mung lipit,
Ing kanakung kutang bakit? Balen bakit?
Ing kekang kabilian lalung magkasakit.
Nukarin la detang pupuntang mangaku
Ilang timpulan mu, king bakang mayangu,
Kanyang kasakitan a keka migupu
Ing pamanaya mu malwat nang mebigu,
Ding maglolo keka a magparalampu
Kelingwan da na ka kaibat mung tinangu.
King pamanaya mu king pangakung lubas
Dakal nalan galdo dinalan, linabas;
Potang magbalik la ing mwa mu miugnas
Ketang darala rang abias at sardinas,
Bista’t ing katutuan king kaban dang limas
Ing panaru keka e ya man kapulas.
Balen mipakde ka, lon mung malilyari
Ing pamaglingu ra, patluran mu ngeni,
Ngeni na ing oras ban ibayu iti
Pilinan meng mayap ing keka magsilbi,
Ding kwaltang babie ra isakwil mo reti
Ing aldo mung bukas ba yang sunlag mayli.
Nung eka mipakde king kekang kabilyan
King kaba ning bie mu lunto kang alipan,
Ikang mayupaya nung pitutuliran
Ding kinwa mung ipus ba’ra kang pagsilbian,
Ba’t potang mipuk no’ kanyang katungkulan
Magparalampu kang manyawad kasopan.
Ing lapitan daka e wari yang sukat
Ban pamatulan da ing bie mung magsalbat?
Bakit ing bage yan e ra ararapat
Agyang pengaku rang tutu nang malambat;
Balen mipakde ka, mata imulagat
Dinan mu nang sepu ing e ustung dapat.
Mipakde Ka Balen, ngeni yang panaun
Ding sablang maluka king balang mitipun,
Ing mapisan-metung yanang ibalayun
Saup-saup lukut dase ning pagmalun,
Ing kasakitan mu banang mako mamun
Pilinan meng mayap ipuk mung magtimun.
Neng Dolly Gigante-Ferrer
Barangay Anunas,
Angeles City
Pawaga:
Iting kawatasan a peparala na
Ning kabilang karing bayung poetisa
At ngeni yang alal a peka-prinsesa
Ding poeta’t talasulat ning Pampanga,
Anti nang gigising king paksang diwa na
Ing midalamat a pagmalun ning Masa
Karing kekatamu miglolo ban mipuk
King katungkulan a anti ra mung silmuk
Busal ning pagmalun a nu’ ing miratuk
Pawa mung pangakung mipimpin king suluk,
Pablasang kaibat dang king puesto milukluk,
Ing sable dela nang mipaid ning asuk!
Inya mangaintulid mupin ing e ta’na
Kabud na manwala king ipangaku ra,
Deting pasibayung lalapit kekata,
Nune dapat mu ping pakapilinan la,
Agpang king mipuk a bayu rang prinsesa,
Ding bibilug king Colegio ding Poeta
A karapat-dapat ipuk king dangalan
Ning sampat at legwan ing keying kabilyan,
Ngening ya naman ing Pamuntuk deti‘nan
Angga na king kuldas ya king katungkulan,
A mepisanmetung lalam nang bubungan
Ning ngeni bayung Parnasong Kapampangan!
