Misan apuna ke ing kanakung pusa,
king kisami atin yang lalon maratna;
E ya kukurap at kikimut bitasa
keng pangatalungku king bangkung makaba.
Migsandal kung bagya king kakung luklukan
king ba’ kung akit ing keyang pag-umasdan;
Lupisak la pala a aplit tatagal
karing libad-libad a ayup-ayupan
Marahil ing pusa ikwa nang meinip
inaklung nong’ bigla retang keyang bitis,
Saka ya sinigpo a mipnu kabilis
liksuan ne’ing kurtina’t karin ya migsabit
Uling ing kurtina bigla yang mipaspas
meyuyut ya itang metung a lupisak;
Ketang lande kwayan karin ya mebalag,
minatna yang bagya’t marapal kinusad
Tegalan ne nitang pusa ing butiki
karetang kuku na asagmit ne iki;
Dapot ing lupisak gulpi neng kewani
king katawan na ing iking kukuratsi
Ing pusa ku naman ta’ ya gagalantang
king putut a iking keyang pamyalungan;
At ing lupisak a nandin na tegalan
misampa ne dalig, malaut ne disan.
Nung pakasuryan mu ing metung a bage
ding lelangan ning Dios atin la ngang tagle
abilidad para iti gamitan de
nung makananu rang i dipensa ing bie
King eksenang ita a kanakung ikit
king katutwan ning bie mibusni ku isip;
E ka pala dapat kabud mu tatangis
ustung mirasan ka king oras a gipit.
Vhelle V. Garcia
February 28, 2013
United Arab Emirates
