Kung totoo itong balita r’yan hinggil
Kay 1st District Congressman Tarzan Lazatin
Na di na raw yata makuhang harapin
Ng butihing Solon ang kanyang tungkulin
Sa Batasan, sanhi ng hindi malamang
Dahilan o dala ng medyo huminang
Resistensya ng kanyang pangangatawan,
Pagkat siya ay may edad na rin naman
Para matutukan ng husto ang dati
N’yang mga gampanin nang madali-dali,
At kung saan di lang minsan ay napili
‘As most outstanding congressman’ ng lipi
Ng magagaling na naging ‘public servant,’
Gaya ni Tang Feleng – namana ng anak
Ang husay at paglilingkod ng matapat
Ng ama, at siya bilang mambabatas
Ay di lang din naman minsan nakatanggap
Ng rekognisyon at iba’t-ibang ‘award’
Bilang pagkilala sa galing at sipag
Sa paghahain at pag-akda ng batas.
Pero ngayong siya’y nagkaka-edad na
Natural lamang na di na niya makaya
Ang dating pagkilos na gaya nang una,
Na siya’y kasibulan o machong-macho pa.
At kayang-kaya pang makipagdebate
Ni sir sa Congress bilang Representante,
Kaya’t ngayong di na niya kayang bumiahe
Ng malayo, babalik bilang Alkalde
Na lang ng Angeles ang kanyang puntirya
Imbes mag-reelect bilang Congressman pa;
Gayong may isang ‘term’ pa siyang natitira
Para sa posisyong hawak pa rin niya.
Sa totoo lang ay aking nakausap
Si Cong Tarzan bago pa siya mag-‘file’ dapat
Ng COC para humabol at sukat
Bilang ‘city Dad na uli nitong siyudad.
“Congressman” tanong ko, “hahabol ba kayo
Bilang alkalde sa darating na Mayo?”
“Hindi” aniya, “sa Kongreso pa rin ako;”
Malinaw na sagot sa katanungan ko.
Kaya nang malaman nating nag-‘file’ siya
Ng kanyang COC, tayo ay nagtaka
Pagkat imbes Kinatawan ay Mayor na
Ng Angeles city mismo ang target niya.
Dahilan na rin sa ating pagka-alam
Ay magkumpare si Tarzan at Pamintuan
At batid nating di sila maglalaban
Sa iisang puesto, sa puntong naturan.
Pero aywan lang kung totoo talaga
Na ang sanhi yata nitong naging mitsa
Ng ‘hiwalayan’ ng dating magkasangga
Ay itong nagduda umano ang isa?
Nang makita niya sa isang ‘local paper’
Ang litrato nina EdPam at ‘vice gov Yeng;’
(At si Cong Tarzan naghinala marahil
Kay Mayor na iba ang tatangkilikin?)
Anu’t-ano pa man ang naging dahilan
Ng ‘tampuhan’ nina Cong Tarzan at EdPam,
Ya’y di na ngayon ang pag-uusapan
Kundi kung sino ang dapat na ihalal;
Sa Angeles… kung ang may edad ng manok
Na ngayon ay di na yata makapupog
O itong malakas pa ang kanyang tuhod,
At parang agila kung ito’y kumilos?!
