(Kaugne ning pamagmasusi king pang-419 a banuang “Aldo ning Macabebe” a merapat ketang a-17 ya iting bulan ning Enero, miparangalan at mipagkaluban lang kaustan ning pamipaulaga antimong Poeta Laureadu king Amanung Sisuan ding atlung anak ning balen Macabebe a kabibilangan nang Diosdado L. Mallari at Franciscco M. Guinto ning barangay Sta. Maria;at Felix M. Garcia ning Tacasan. Ginale ne ning maluka yung talasuyu iting kawatasan a makatuki para king mesabing katatagan)
Bayu ku pu tagkil king kaku mitungul
Gampanan kaniting maulang okasyun,
Muna ibabie ku king mapuring mayor
Ampon karing sablang keti pesitagun
Ing mayap a abak at banal alayun,
Ning keti masaya tamung pami-agum
At antimurin kang Mayor Leonora Wong
Ning ngeni santungan kung balen San Simon,
Kaya pasalamat ku pung asnang dagul,
Keng pamanagun na kaniting okasyun,
Kaustan ning iting mibie rekognisyun
King kayang kabalen dinian nang panaun.
At bilanggalame ning Amanung Sisuan
A sukat masese, madilig, malinang
Kapamilatan ding anak nang gugusal
Ning balen at ning mal tamung lalawigan,
Nung nu’ kabilang ya kareting mapilan
Ing ngeni paksa na ning pamiparangal
A makaparikil king mapuring anak
Ning keti king balen makalmang misapuak,
A mangaintulid nang miputung at sukat
King kayang kanuan ing laurel a matindag,
A pekatanda ning ya karapat-dapat
Neng mibilang karing laureadu nang ganap
At bilang poeta a tune malugud
King sabing e sukat mipabusten lumbug
Ngening iti alus manganib neng maniud
At king danggul dila ding dakal matakmus,
Ing laurel ning dangal a miputung lubus
King mamu nang kanwan dakal ya isaup.
Ding keraklan karing dapat manimuna
Ban magambul mayap ing manang kultura
At salitang dapat sesen king labi ra,
Ila pa mismu king kelan masabal da
Ding maging berdugu a sasakal kaya
Ngening asdap-asdap niamu pangisnawa.
Salamat, at mika Annette Flores-Balgan
A ngeni alkalde ning balen tang’ tibwan,
Mirinan yang dake kaniting tiuntiunan
Ning pamagmasusi king “Aldo Beitan”
Na ning Macabebe ing Amanung Sisuan
Lalam ning matapat nang pamanungkulan.
At ing metung karing malugud nang anak
Ning balen mirinan yang dake masampat
Ban iputung keya king kanwan nang maslag
Ing laurel ning dangal, bilang talasulat
At poetang sukat at karapat-dapat
Mitagurian tune laureadu nang ganap.
Uli niti, kambe na ning mayor tamu
At ning mipagkalub a upaya kaku
Bilang Pamuntuk ding malugud amanu,
Iputung ke king kapatad a Diosdado
Ing laurel ning dangal ngeni arapan yu;
At bilang patibe kang Mayor aduan ku
Ing keyang masuyung antabe kanaku!
(Miputung ya ing ginintuan a laurel ning dangal kang poeta Diosdado L. Mallarikampamilatan nang Mayor Annette Flores-Balganat ning kekong talasuyu, Felix M. Garcia)
