Halos pitong buwan pa bago sumapit
Ang halalan, pero haya’t maririnig
Na natin sa ibang mahusay gumimik
Ang pasimple nilang mga ‘campaign sorties’
At bagamat yan ay maaring sabihing
Paglabag sa batas o ‘electioneering’,
Ito’y di tuwirang paglabag sa ating
‘Omnibus Election Code’ kung tutuusin
Dala na rin nitong kung di diretsahan
Ang pag-gamit ng ‘Vote’ o salitang “Ihalal”
Sa unahan o kabuntot ng pangalan
Nitong sino pa man yan ay hindi bawal
Gaya halimbawa kung ito’y pagbati
Ng “Masayang Fiesta” o anumang uri
Ng mga pahatid mensahe kunwari,
Dala ng kung anong mga pasubali;
Na aywan kung sadyang hindi hinigpitan
Ng Comelec itong mga panuntunan
Hinggil sa ‘Omnibus Code’ nitong naturan
Sanhi ng kung anong ‘exception’ kung minsan.
Kaya naman hayan kahit batid nila
Na pinagbabawal ang pangangampanya
Ng ganyang ika nga ay sobra kaaga,
Ay marami na r’yan ang nagkagasta na.
At ngayon pa lang ay dumukot ng tiyak
Sa bulsa ang ibang sagana sa lahat
Ng bagay na puedeng isugal at sukat
Para makalamang pagdating ng oras
Na siya namang pinag-pipiestahan nitong
Walang hinihintay kundi ang panahon
Ng halalan para muling magkaroon
Ng laman ang bulsa ng higit marunong
Sumakay sa bangka ng alin mang panig
Na inaakalang siyang mananaig,
Pero kapag ito’y medyo tumagilid
Ay sa kabila na sila nakakapit.
Na di nalalayo sa asal at gawi
Ng ibang opisyal na napakadali
Din namang mag-ala Hunyango, sakali
Ang sinasandalan ay biglang mabali.
(At wala ng lakas para maging hagdan
Patungo sa mas mataas na tutungan,
Gaya nitong dating taga Malakanyang
Na iniwa’t sukat ng alagang tunay)
Pagkat sa daigdig nitong pulitika
Ay tunay na walang tiyak na kasangga,
Di lamang sa mga lider at iba pa
Kundi pati na rin sa botante nila.
Kaya, gaano man kaaga ang gawin
Nating paglilibot upang ating hingin
Ang suporta r’yan ng manghahalal na rin,
Ay bale wala at malaking gastusin
Para sa sinuman na nagnanais na
Mangibabaw laban sa ‘opponents’ nila,
Pagkat di sa ‘early campaign’ makikita
Ang galing at husay ng kahit sino pa.
Kundi sa kung anong klase ka ng lider
Kung ‘re-electionist’ ka at nasa poder;
Pero kung baguhan ka pa o ‘newcomer’
Ay ibabase yan sa ‘moral character’
Ano’t-ano pa man ang sobra kaaga
Kung kumilos ay may ‘advantage’ sa iba,
Dangan nga lang kapag sira na talaga
Sayang lang kahit na ya’y doblihin nila!
