Karas king dibati lalu’t pulitika
i goryu at bosyung ilang pane bida,
at pablasang deti mapalpakitwa la
nung inia madalas ilang mikokontra
King nanu mang bage ela mikasundu
e la paisaul at e biasang susuku,
agyang balu ra pang kule yang malutu
ipilit deng asul, e paysambut batu
Dapot deting adua e la mapipikun
‘nu man anti pali karelang diskusyun,
agyang tamban do pa detang maka-mirun
e ro kararagli akuang apisabung
E ra mo kalupa ding taung aliwa
nung ela mibata mibubugnus la muwa,
uling mikumpari la pin deting adwa
kaibat ning dibati muli lang payapa
Nung inia king baryu ila ring madalas
a pikukutnanan ding matwa at anak,
lalu nung atin kang buring atalastas
a nanu mang bage patungkul king batas
Pero ketang misan deting mikumpari
mekumbira la king metung a dibati
apikasundu rang ngeni mu mang bengi
king ban lang sumambut ilang mipangampi
Inia ing resulta ila ring mekakwa
king mumunang galal king binye rang paksa,
at pauli na ning milalu rang tula
king metung a beerhaus migpaindalan la pa
Ding perang simbut da pipitna ro pamu
bayu la linub king patda-sinding sulu,
pwede na kekata agyang tiya lima mu
kaibat muli ta’ na ngana niting Goryu
Sige nganang Bosyung a keya minayun
kuma ta na namang pulutang sitsarun,
dapot mipasubu la king pamaninum
deting mikumparing mapad king diskusyun
Ikwa rang melasing ume mipanagkat
muli king ban e la lumalam king oras,
pablasang ala nong’ saken a ayabat
apikasundu ra namu ing maglakad
Kabang lalakad la deting mikumpari
alabasan nala ning metung a kotsi,
atin lang initsa ding sake na niti
a digpa mismu king arapan da reti
Migtalungku la ren saka da inapis
ing mapali-paling bage ketang plastik
uling madalumdum at e ra akakit
ding adwa kanita nala mipagkulit
Ngana nitang Bosyung “king kakung palage
bayung lutung pansit o kaya kalame”
“Ali” nganang Goryu, “tamalis yan abe
at ban tang apihu masanting busni te”
Lelak de ing plastic, saka re bilatlat
at ume kilkalan king taliring gamat
tikman da at karin da pamu ayalak
‘diaper’ ya palang ating “pupung anak!
“ARU dinat pala”, agnan dang gilisak
“kapanamu ali ta’ rugu adakurak!!!
Vhelle V. Garcia
September 23,2012
Abu Dhabi, United Arab Emirates
