Sasabyan ding matwa/ Detang Talibtab emo pakyapusan
Ban eka mipara/ At magdili-dili king kekang kabilyan,
Kening poesiya/ Nung nanung sangka’na ya ing salesyan
Bakit lulwa’la mu/ Neng benging tahimik busal ning kaniglan.
Agpang king istorya/ Karelang sasabyan kanitang minuna
Deting Animales/ Ngaring magsalita adwa ing grupu da
Ding sablang maglakad/ Anti ing Leon, Damulag, alwa pa
Miyabe la kanu/ King karelang grupu, misasan-metung la.
Ing pangadwang grupu/Ngara ding pakpakan, anti mo ding ayup
Kabilang do retang/ Pabu at kulisap, tamumu, ding manuk
Lider dang tutukyan/Yapin ing Agila gewa rang pamuntuk
Ing balang sabya’na/Karelang panwalan at ing kayang utus.
Pablasang adwa la/ King metung a lugal, ding gagalo grupu
Ing karelang sakup/ Inya dininan dang angganan da kanu,
Kanitang angganan/ Ninu man ing lagpas mirinan yang kasu
O miparusan ya/ Nung apatutwan dang ginawang e ustu.
Nanupata deti/ itang pikasundu karelang tutukyan
Nya alang lalabag/ Ketang pikasundu nanu man ing gawan,
Dapot detang dagis/Karelang arakap metung a pakpakan
A makalub ketang/Sasakupa’ ning karelang anganan,
Itang Talibatab/Dela re king kampo inarap king leon
Kitang ning pamuntuk/ Bat linub ya karin kaninu ya memun,
Pekibat na niti /Abe yuk u ngana ampon kasan-metung
Lawan yong ipan ku/ Ampon dening bitis lalakad keng gabun.
Ketang pekibat na/ Meniwala la ngan detang kayang karap
Inya binilang deng/Karelang kayanib agyang tin yang pakpak,
Manibat kanita/ Iti milibre neng karin lakad-lakad
Inya meragul ya/ Buntuk nang malati nitang tlibatab.
Ining talibatab/ Tin yang kamulangan…inya kayang gewa
Karetang tuntunan/Eya bisang tupad, lalabag yang kusa,
Balang kayang kimut/Agyang ena ustu ali re apuna.
Uling pangangas na/ Ining Leon kanu yang kaya kinangwa.
Misan sinobra na/At meging abusu itang kayang dapat
Inya a isip nang/king sumangid kampo munta yang lumipat,
King kela’nang kalma/Mismung ing Agila ya ing mekarakap
Ngana: bat keti ka/Alang kapamunan kabud na linipat?
Pakpakan ku naman/Nya keti ku minta nganing pekibat na
Tin kung karapatan/Ban lumibut keti a anti mo ika,
Saka no weswas/Detang kayang pakpak arap ning Agila
Nung makanyan abe/Sige ken libri ka….Agyang nuka munta.
Mayli yang dili na/ ketang kalokwa’na nining talibatab
Ing balang buri na/ king mingatbang kampo kayang ararapat,
Dapot inyang misan/Ding adwang pamuntuk ikwa rang miyarap
Yang apisabi ra/ Ing kamulanga’na nitang talibatab.
Ing pikayari da/ Pareho deng lako king karelang grupu
Ban ing kayang dapat/At kamulanga’na mirina’nang sepu,
Inyang abalu na/ Karela yang leko maybug yang mangulu
Dapot ding karap na/Agyang nang gawa’na ere man sikasu.
Utus ning Agila/At saka ning Leon karetang kayanib
Dyan deng kaparusan/Itang Talibatab nung karelang akit
Lulub king sakup da…/ King mingatbang kampo ali ne pepakit,
Inya bat kanita/Bengi nya mung lalwal ban alang manakit.
Diwa:
Iti kwentu yamu…/Agyang karing tau tin yang kabaldugan
Itang pamamangka/Karing adwang ilug e dapat gagawan;
Nanu mang binye rang/Mipagkalub keka obra o tungkulan
Karetang tuntunan/Ikang munang tupad emo daralpakan.
