Siuc ning uran!
Tiup ning angin!
Anti cu pang tiaman-tiaman
Ding siping cu e co pansin,
Nan cu mo nung e na tucnang,
Total manakitan cu rin;
Danum ngacu nung dagul man
Cacu lalung macasanting
Miragdag cu panakitan
Agiang e cu manalangin.
Lumbug… mas lalu cung buri
Panialiwan lalung mitas;
Munang diling magmasali
Cape, mayumu at gatas;
Bucud pa king lati-lati,
Ken mung cacung tindang abias,
Tiac gumamal cung salapi
King isingil cung patumpac!
Nanu mo’tang pakialam cu
Caring cacung siping bale?
Maulagang dili cacu
‘tin cung sapat a pagcabie;
Nanu’t e king comersiu cu,
Pakinabang idobli ke
Ngening iti ya ing tiempu
A ikit cung masalese?
Uran… e tinucnang ‘nabis,
Aldo’t bengi lalagusgus,
Dapot e cu metigatig
O mesira caya tudtud;
Masanting ngacung mimisip
Mabitas ne itang ilug,
King ba’namung lalung milis
Paniatang na nitang albug!
Mecabulad… medalumdum
At ikit cung biglang-bigla,
Cabud na mitas ing dadun,
Minabut lampas cung baba;
Cagnan ning dimdam cung ayun,
Bale cu ta’ne miragsa,
Inalsa ne nitang alun
At meniud yang anting bangca!
“Dios co, e cu biasang cawe”,
Nganing sinacsac king isip,
“Ngening manganib cung mate,
King bili cu ninung sagip?”
Awsan ke’ing siping cung bale,
Dapot cacu e linapit,
Bagcus lalung linaut ne
Bangcang cacu na pigcait.
Ginulisac cung masica,
Ban sagipan na mo sana;
Nanu’t e ya melikid man
At ikit cung meili ya pa;
Cambe ding ikit cung dintang
A mamangcang calupa na,
Alang mignasa metung man
Ban iligtas da cu keta.
Alto, lumbug cong sisicad
Ding canacung aduang bitis,
Cabang ta’cu asdap-asdap
Mangisnawang magcapilit;
“Dios co” ngacung gugulisac
Sisisian cu at nung bakit
Pepaysilo cu king pilac,
King e mayap mig-intiris!
Nan cu mang capcap tambulin
Ban e lumbug ketang danum,
Danum at danum murin
Pati salpuc na ning alun!
Salamat… casisicad pin
Biglang dimdam cu king sacung
Itang kirut a matinding
Kepacde cu’t biglang gising!
Milagat cong cacung mata…
“Dios co” ngacu “salamat pu;
Apaninap cu mu pala,
Miliaring ikit cung tagpu;
Babalacan cu pa sana,
Baket tambing yu nang balu?
At cacu pepakit yu na
Ing maliaring maging tutu”
“Dios co, king capilan pa man
Tatantu cu king sarili,
Ing e cu balacan mu man
King aliwa mamintahi;
Nune ipangacu cu pung
Itang peca-mayap dili,
Ya ing munang cacung daptan,
Ibat na king aldo ngeni!!!”
