Dintang ya i Simun menibatan Saudi
kaibat ning pabanwang kontrata na niti,
at uling bina yang dakal a bagahi
pepadakit ya king pamilya na iti
Kabang magbiyahi la pauli king bale
kinwa ne king bag nang Simun itang sukle,
at saka na kitang ketang kayang abe
nung bage ne itang buwak ng pepakule
Kapanamu ngana niting asawa na
pepakule kang buwak pepakaban me pa
nung inia e ra ka agad akilala
uling menaliwa ing kekang itsura
Aliwa na ngeni datang ing panaun
dakal nang mibayu uli ning panyulung
alang marok nganing pakibat nang Simun
yapin ing usu yan a keya pang siglung
Lima kami ngana king metung a kwartu
migsikap para ing sarili mibayu,
alisyan mi na ing pamanigarilyu
sugal, alak ampon aliwa pang bisyu
Di masanting ngana a keya mekibat
nitang asawa nang mikuswelung ganap
uling kanita pa ing kakung paninap
sana alako mu pamaninum alak
Karas da king bale, ining bagahi na
linub da king kwartu at karin biklat da;
dakal la ring taung disan na karela
migpakapuyat a keya menenaya.
“Balaku sa ngamu ena ka miminum”?
ngana ning misis nang keya maka-mirun,
“bakit ating alak king metung a kahun?”
“kang paring Ruben yan” pekibat ng Simun
“At ing sigarilyung kanakung kewani
pandinan mu la ngan ding anggang sisindi
uling balu muna neng akung mumuli
ding tambay keti la agad sasalangi”
“Ining sabun” ngana, “isalikut mu pa
pati ining kape a para kang ima”
“o ing para kaku” nganang migsalita
ning keyang asawang magtampu nang bagya.
“Mangalkal naka ken marakal pa naman
dakal ku penyaling ken mu maka-busal
neng melingo naku eku na balu man
nung nu ku akabit” nganang Simun kanyan
Anyang mibuklat ya ing bagahing metung
timan-timan ne ing asawa nang Simun
uling ing ikit na ketang tawling kahun
purus pambabai ing karin mibuntun
Siguradu ngana niting kayang misis,
kaku ing pabanglu at ining make-up kit;
paynawa ka nganang Simun mabubusit
kanaku ngan pu yan pati na ing ngihties
“E wari nandin pa kaku nang sinabi
a migbayu naku karin pa king Sudi
ing lagyu ku ngana e na Simun ngeni
nune Samantha nang ganap a babai?”
Vhelle V. Garcia
June 10,2012
Abu Dhabi, United Arab Emirates
