LUNGSOD NG CABANATUAN – Umaabot sa P117,980 na halaga ng hinihinalang shabu ang nasamsam at walong suspek ang naaresto sa magkakahiwalay na anti-drugs operation ng Nueva Ecija Police Provincial Office (NEPPO) nitong Jan. 22.
Batay sa ulat mula sa tanggapan ni Col. Ferdinand Germino, provincial director ng NEPPO, ang mga operatiba ng Talavera police station ay nakakumpiska ng 15 gramo ng shabu na tinatayang nagkakahalaga ng P102,000 sa buy-bust operation sa Barangay Pinagpanaan.
Dalawang indibidwal ang naaresto sa naturang operasyon, ayon kay Germino.
Samantala, ang magkakaugnay na operasyon sa mga bayan ng San Antonio, Quezon, Sto. Domingo, Talavera at Gapan City ay nagresulta sa pagkadakip ng anim na iba pang auspek, ayon sa opisyal.
Sa kabuuan ay nasa 2.25 gramo ng shabu na nagkakahalaga ng P15,980 ang nasamsam sa mga naturang buy-bust operation, sabi pa ni Germino.
Binigyang-diin ni Germino na ang tuloy-tuloy na anti-drugs operation sa lalawigan ay nagpapakita ng hindi matatawarang dedikasyon ng NEPPO ” in combating illegal drugs and safeguarding the well-being of local neighborhoods.”
