DONA REMEDIOS TRINIDAD, Bulacan – Patay ang limang kalalakihan na
mananabas ng damo sa bulubunduking bahagi ng Barangay Camachile dito
kahapon.
Ayon sa ulat ng DRT Police, nakatanggap sila ng impormasyon na narinig ng ilang
residente ang alingawngaw ng putok ng baril sa nasabing lugar.
Nang ito ay kanilang nirespondehan ay nakita ang bangkay ng limang kalalakihan
na naghahawan ng damo sa lugar. Isa sa kanila ang kinilala sa alyas Pilo habang
hindi pa napapangalanan ang apat.
Ayon kay Capt. Eugenio De Ramos, hepe ng DRT police, maghahatid sana ng
pagkain ang caretaker sa lugar ngunit bangkay na ang mga ito nang makita sa
lugar kung saan naghahawan ang mga ito ng damo.
Batay aniya sa inisyal na ulat ng PNP crime lab, isa sa mga biktima ang may tama
ng bala sa batok habang may mga saksak naman ang apat. Narekober din sa crime
scene ang tatlong basyo ng 9mm na baril.
Patuloy pa ang imbestigasyon ng kapulisan sa insidente para matukoy ang mga
salarin at motibo sa krimen.
