LUNGSOD NG OLONGAPO –Patay ang apat katao na sakay ng kotse matapos itong salpukin at daganan pa ng isang dump truck sa kahabaan ng National Highway sa Purok Singko y Medya, Barangay New Cabalan sa lungsod na ito kagabi, Nob. 12.
Naganap ang aksidente pasado alas-8 ng gabi makaraan mawalan diumano ng preno ang dump truck (CAK 1460) papalabas ng Olongapo habang kasalubong naman nito ang isang kotse (XPR 424) sakay ang apat na katao nang bigla itong araruhin ng dump truck.
Ayon sa ulat galing umano sa pamamanhikan ang mga biktima at papunta ng Olongapo para mabisita ang isa sa mga kamag-anak nang maganap ang aksidente.
Ang mga biktima ay natanggal sa pagkakaipit mula sa dumagan na dump truck ng ibat-ibang nagrespondeng rescue team ng Olongapo. Sila ay ideneklarang dead on arrival sa James Gordon Memorial Hospital.
Ang dump truck driver ay kaagad na sumuko sa pulisya at inihahanda na ang kasong isasampa laban dito. Contributed photo
