1.
Pigmasususian ding memalen ing aldo ning pangatatag
ning balayan ning San Simon napung Sabadu ning abak
penimunan ning malagung i acting mayor Anne Canlas
kambe ning bise alkalde at konsial a mangasipag
tinagun la ring mapilan a kapitan at kagawad
da ring miyaliwang baryu na ning munisipalidad
2.
Matagumpe ing programa ning makule katatagan
at dakal la ring menalbe ketang palbaksan festival
balang mayaring tinerak a baryung mekiligligan
kukulyo la ring manalbe’t kukurug ing palakpakan
king pepakit dang talentu ding mikyabeng kayanakan
linto ya leguan at tindag ing kulturang Kapampangan
3.
Agpang kang Keko Almario ing founding anniversary
ning San Simon king panaun nang mayora Wong milyari
ya ngana ing migumpisa king pamagmasusi kaniti
banwa pang 2010 iniang i madam Wong ing alkaldi
at manibatan kanita pagmasusian da ne iti
ding memalen ning San Simon angga king panaun ngeni
4.
Meging dake namu naman ning masampat a programa
ing pamamie plake bilang tanda ning pamangilalala
king melalapupuring asias na ning agumang AGTAKA
laureado internasyunal, poeta Felix M. Garcia
uling king meging ambag na ban lubus misaplala ya
ing amanung kapampangan, tradisyun at ing kultura
5.
Kabilugan ing programa dinagus yang masalese
mesaya la’t mikuswelu ding anggang taung menalbe
lakuas na ring residenti na ning barangay San Jose
uling ila ring sinambut king ligligan menagumpe
i kap Oliver Malonzo as ne kakuswelung tune
abakas mu king lupa na ing timan na ning tagumpe
