BALANGA CITY – Dalawang babaing magpinsan at magkapitbahay sa Barangay Cupang dito ang namatay nitong nakaraang linggo matapos makuryente ang isa habang nagsasampay ng kalalabang damit at sinundan ng pangalawa upang sumaklolo.
Ayon kay Ding Tuazon, unang nakuryente at bumagsak ang kanyang manugang na si Cindy de Jesus Tuazon, 27 at bumagsak din ang tumulong na si Reggie de Jesus, 31. Dead on arrival sa Bataan General Hospital sa lungsod na ito si Reggie samantalang inabot pa ng hapon sa emergency ward ng nabanggit na ospital si Cindy bago binawian din ng buhay.
“Maaaring dahil sa katagalan ay natalop ang wire ng kuryente at nadikit sa yero kung saan nakadikit naman ang alambreng sampayan,” sabi ni Ding. “Biglang bumagsak si Tita Cindy, bumagsak din si Tita Reggie kaya tumawag ako ng tulong,” sabi ni Renzo de Jesus, 10, na nakasaksi sa pangyayari habang naglilinis ng dustpan.
Hinawakan umano ni Tita Reggie ang kamay ng kanyang Tita Cindy na nakabulagta noon. Umiika sa paglalakad dahil masakit ang paa ni Ryan de Jesus dahil sa epekto ng kuryente nang saklolohan niya ang asawang si Reggie.
“Hinatak ko asawa ko sa damit pero nakabitaw ako,” sabi ni Ryan.
