LUNGSOD NG BALANGA — Ibinalita ni Gov. Albert Garcia Miyerkules na kabilang ang dalawang paslit sa anim na bagong gumaling sa coronavirus disease sa Bataan.
“Ikinalulugod naming ibalita na sa tala ng provincial health office Martes ng gabi, anim, kabilang ang dalawang bata, ang naka-rekober kaya umakyat na sa 129 ang kabuuang bilang ng mga pasyenteng gumaling sa Covid–19,” pahayag ng gubernador.
Ang mga batang bagong gumaling sa mapanganib na sakit ay isang 3-taong gulang sa Balanga City at isang 11-anyos sa bayan ng Pilar na parehong lalaki.
Ang iba pang naka-rekober ay isang 72–anyos na lalaki mula sa Lungsod ng Balanga, 21–anyos na babae at 26–anyos na lalaki sa Pilar, at isang 86–anyos na babae mula sa Orion.
Nananatiling 147 ang bilang ng mga nagpositibo sa Covid-19 at pito ang pumanaw na, sabi ni Garcia.
“Muli, manatili lamang ang lahat sa inyong mga tahanan at ibayong pag-iingat pa rin upang hindi na dumami pa ang kaso sa ating lalawigan,” panawagan ng gubernador.
