Iniimbestigahan ng mga pulis ang sasakyan ng mga napatay na suspek. Kuha ni Rommel Ramos
PULILAN, Bulacan — Patay ang dalawang drug suspect sa naganap na habulan at barilan sa ikinasang buy-bust operation ng pulisya nitong Martes sa Barangay Lumbak dito.
Nakilala ang napatay na sina Froilan Orillosa at Leah Lucas, kapwa residente ng Barangay Tabang, Plaridel.
Ayon kay Bulacan police director Col. Lawrence Cajipe, ikinasa ang buy-bust operation laban sa dalawa ngunit agad na nakatunog ang mga ito na pulis ang kanilang nakatransaksyon at mabilis na pinaharurot ang sinasakyang SUV at namaril.
Inararo pa daw ng mga ito ang mga barikada sa kalsada at nasagi pa ang isang tricycle habang papatakas sa humahabol na mga pulis kahit sabog na ang gulong ng kanilang sasakyan hanggang sa mapahinto ito sa harapan ng isang establisiymento sa Barangay Paltao.
Agad na bumaba ng sasakyan si Orillosa at nakipagputukan pa sa kapulisan hanggang sa mapatay ito ng nasa 50 metro ang layo mula sa kanyang sasakyan habang isinugod pa sa pagamutan si Lucas ngunit binawian din ng buhay.
Nakuha mula kay Orillosa ang pistolang baril at mga sachet ng hinihinalang shabu sa loob ng sasakyan habang nakuhanan din ng mga sachet ng hinihinalang shabu si Lucas sa kanyang underwear.
Ayon sa pulisya, miyembro ng isang malaking grupo ang dalawa na nagbabagsak ng iligal na droga sa Bulacan at sa mga kalapit na lugar habang patuloy pa rin ang imbestigasyon ng kapulisan sa kinaanibang grupo ng mga ito.
