PABUSTEN muma ya ing tiup na ning angin
at bustem idalit sunis nang masanting,
ning ayup a dugpa king curus ning libing
ban ing bie payapa cayang pagtiririn.
Pabusten ing aldo ume milalablab
gawa’nang biga ing uran ban mayampat
magmistulang asuc, yan king banua paitas
cambe ning canacung dalung at pagsalbat.
Pabusten ing bie cung maranun mawalâ
itangis ning cacung malugud a indâ
caring pipangadian, ding macaganacâ
king panalangin yu, pakiabe yu cu sâ’
Pangadi yu la rin detang e mipalad
mengasintang a bie king ticman dang caplas
king milalung sakit ing maging panaplac
careta nang indu ing lua rang masalpac.
Ipangadi cambe ring balang ulila
at mengasucul king masapsap a dusa
mangadi ca naman ban mayatbus ta’na
king pangayalipan tamung pibabata.
Nung milucupa’nong matuling a saput
ning benging malugma retang anggang puntud
alang bante nu’ne ing macapadurut
a catahimican da ring macacutcut.
Misteryung masinup dinan mung pitagan
at mecad ing dalit keca yang damdaman
ning metung a maliap a yacu mu naman
pagtumaila naca ning cacung pacamal.
Nung ala nang curus o batu mang tandâ
king picutcutan cung kelinguan ding sablâ
busten gambulan ding manasic, at yatsâ
ing mibuntung gabun caretang taldawâ
Ing canacung abu bayu man paitas
king penibata’na mawala ngan sucat
anti mong pangatmu dapat pang micalat
lipugpug king gabun nung nu’manalumpac
Canita, canacu ala nang nanu man
ing calinguan mu na’t cacu nang luyunan
ding kecang alapap, angin, caparangan
at pawang calacsing na mu ing mitagan
Banglu, suala, acling at masayang dalit
sala ampon cule ning mamung panakit
ulit-ulitan cu king balang penandit
ing cataimica’na ning pamanalig.
Sintang Pilipinas, labuad cung pilsintan
dusang pibata cu, kecang ulingiran
tauling panabilin, keca cu lalacuan
caring sablang king bie canacung liguran.
King payapang labuad, ume nacu’t taglus
a alang alipan at pun mapanarus
capanualan carin e ya mapupupus
a pag-Aria’na ning Ibpa tang’ Malugud
Mamu’nacu anac, pengari, capatad
cadake ning pusu, minuna cung liyag
ing pamaglaco cu paniauad cung tawad
kening canacung bie mipnu king panganlap.
Mamu’nacu sintang, bucud cung keyabe
at cacaluguran cacu minantabe
kecayu ngan sablang liguran cung tune
capayapan para canacu ing mate….
Marvel ‘Vhelle’ V. Garcia
December 22, 2016
Abu Dhabi, U.A.E.