1.
Dening pulitiku e no pepatugut
a mipapanyira mipanakdak gulut,
alang kapupusan ing karelang gutgut
uli na ning sangkan king pamangurakut.
2.
Neng magsalita la ala la ngan sala
king pamangurakut mipapanyangkan la
inya ring memalen magugulu nala
nung kaninu la pin sukat a manwala.
3.
Ing makalungkut mu dakal pilipinu
a mengabulag na kareng pulitiku
misan uli na mu ning pamag-idulu
o king penibatan da mung apelidu.
4.
Tandanan tamu sa’ itamung memalen
dening pulitikung kanakung tutunggen
a mapangurakut king kaban ning balen
ilang sukat lawen at sukat ta’ng banten.
5.
Nung atin man mayap pulitikung tapat
a tune susuyu at mayap a dapat
at king bangsa tamu gagawang masampat
deni mabilang la king metung mung gamat.
6.
Dapot ing matsura milalu lang dakal
dening pulitikung ugaling animal,
keti bangsa tamu a alang masabal
a mamanako mu’t magpakabsing batal.
7.
Nanu mo ing sangkan ning kakung susulat?
Nanung pawaga na ning kakung yuyulat?
Ing payabut ku mu bang tamung mimulat
kareng pulitikung e mayap a dapat.
8.
Panayan tamu ngan lunto ing katutuan
kareng kaganapan a kapanakawan,
ding mikisalanan ilang miyatulan
nung e king sukulan, king Dios Makapayan.
PL Eric P. Dizon
