King lablab ning sulu api yang mistula,
Misan ken mung bagul ning angin a maina
King panimanman mu kabud niamu matda.
At uling ing sabla ating kayangganan,
Ing bie keting yatu makanian mu naman;
E ta’ mupin balu nung kapilan ing datang
Ing takdang oras a tituk ning Miglalang.
Misan, bingut ya pa o atyu pa kilub
Ng atyan ning metung a Indung malugud,
Ing bie peparam Na keya ning Ginu Dios
Mekad mu e pa man mapugtu na kabud.
Atin namang ugud-ugud niang maglakad
Pauli ning sobra nang katua o idad,
Pero uling magkang atin la pang dapat
Dikilan nung inya ing bie ra lalambat.
Kalupa ning meging papil nang gimpanan
Ning malugud nang pengaring Mayor EdPam,
A meging Vice Mayor king Angeles iniang
‘Nineteen sixty anggang ‘nineteen seventy one’.
At mekapagsilbi lalam da ring apat
A meging Alkalde ning balayan Culiat,
‘As last town’s vice mayor & first vice city Dad’
Ning Angeles keng panahon a milabas.
At akasaup dang menigobrang ustu
Di kanita meging Mayor del Rosario
Ampon y Congresswoman Nepomucento
Keng panga-aparuba ‘and was signed into law’
Kapamilatan ning Pamuntuk kanita
Dadong Macapagal ning mal tang’ probinsya,
Ing panga-siyudad ning balayan nang sinta
Ning meging mapuring anak ning Pampanga
A’yala’t aliwa nune y Tatang Bert,
(Pengaring lalaki ning ngeni Mayor Ed)
A meging Vice Mayor keti king Angeles
Kilub na ning migit ‘straight eleven years’.
Puera pa king bayu meging Vice Mayor ya,
Mig-Kapitan ya Pulung Bulu kanita;
At ding kayanakan penimuna nala
Keng mangasanting a inorganisa na
At nu’ community services ing dapat
Tutukan, kabilang ne ken ing ‘clean-up drives’
King palenke ampon keng ‘surrounding areas’
Ban ing dalan danum e mibara’t sukat.
A’yalang unabis a pamiyaliwa
King ngeni daraptan na’t gagawan kusa
Ning mapuring anak niting meging paksa
Na ning sinulat kung ta’na memayapa
At minuli na king tituk Nang karinan
Ning Dios para karing mapuri at banal,
A nung nu’la karin at pihu nang dasan
Ding kapamilya rang kinua ning Miglalang.
A e ta’ asagka o ning ninu pa mang
Maupayang tau keti king sikluban,
Pablasang ing sabla king yatung karinan
Keng kaburian ning Dios ating kayangganan
At alang malakuan nune ing dapat na
Ning ninu man kabud iti milibing ya;
Nung king meging bie mu binang marawak ka,
Maluat na kang mete, ya pang pisabian da.
Dapot nung mete kang mapuri king bie mu,
Pawang kayapan ing pisabian ding tau;
At nung arapat dang mie kang pasibayu,
Alang kapilisian aduan da king Ginu!