Today's Punto
Today's Punto
Opinion
Ing Mamanata
By Felix M. Garcia

Apr 03, 2018

(Kaugne ning milabas a Maleldo, a nung nu’ e la mabilang karing taliri tamu ring memanatang magpenintensya, antimong pamakirame kang Jesus king kasakitan a kimtan na kanitang aplit deng pamalasbasan ding Judio kabang pupusanan Ne ing krus a pipamakuan da Kaya papunta king ausan dang Bunduk ding Bungu. Nung tutu ing ngara makabawas maragul king kasalanan ning magpenitensya ing antiti, keng pamalak yu, e kaya lalu mung mekaragdag karing buknul nang kakalagan, liyus king ikakayap na ning taung malino lerawan na pamirapat-dapat ning sinulat kaniting poesia, ngening kabaligtara’na ning kayang parasan ing pangawa’na?)

KALUGLUGLUGLUG pa ing dayang melangî,
king gulut nang silab ning milalung palî.
Ing malan nang likas, e pa man mepipî,
king atin miminum agad neng milayî

Kaduang na ning basu, delukduk neng agad,
saka no pemakit ding dakal nang tabad.
Pegparangala’nang digsu e misadsad,
uling nabengi king alak ya misagad.

E man binang migluat ikua nang melasing,
ania e petugut a migmamagaling.
Mesora ya kaya’ing kalupa nang muting,
penumbuk ne niti ampong penampaling.

Uling malasing ne e man mekalaban,
pemalmura na nia mu’ing menampalasan.
Ing gewa na niti timbuk ne pang misan,
anti yang inatbang sagin a mibulang.

Pisanan da nia mu ring kayang kayabe.
piguyudguyud deng inuli king bale
Kasayad na pamu king karelang lande,
ing abe na naman ing digsu na pete.

Uling ing buri na abuta’neng kualta,
ibat karing upa nang pamamalantia,
Anggiang e man bisa ing kayang asawa,
uling melamug ne, inabut na nala.

Kaduang da ring pera a kayang inawad,
ing metung nang anak inutus neng agad.
Pepamulayan ne ban sali yang lapad
ban ing pamaninum na kayang asagad.

Ketang benging ita ring anam nang anak,
karing balang pisni ra ing lua papatak.
Pisulusulu ra ing banging maritak,
kabang ing ibpa ra miminum yang alak.

Aniang milalu ne migsabisabi ya
king kayang sarili ne migpag-istoria.
“Pare,” ngana niyan, “king tutuking banua”
“alang pasubaling mamanata ku pa.”

“Uling ing bugtung nang anak ning Dios tamu,
mete ya pauli ning sala ning yatu.
Ania marapat mu ing magdarame ku,
ban atukian ku la ring bakas nang Kristu.”

Rodel E. Gozum
28 Marso 2017
Muñoz, Lungsud ning Quezon




Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions