Today's Punto
Today's Punto
Opinion
Batas ning bie
By Felix M. Garcia

Mar 01, 2018

ING ALDO limbug ne,
at keta ing dulum
ya ing sinalake
king sala’ng mesaul!

Yan ing batas ning bie
binie ning Miniaklung?
O yang wagang tune
sukad ning panaun?

At ing sablang bage,
kukupas lalaun?
Kapara ning aske
na ning patingapun

Agiang aguantan me,
emia’ pigil dulung
potang magpampan me
at keta tulandung

Ing Aldo miglakbe
kinusad maranun
gulut ding matawe
bunduk a magmalun!

Ah… nanu mang bage
sungab ngan king aun,
at ding sablang mete
miuman lang mibangun;

Kambe da ring mabie
atulan ning Hukum,
At sinubling mebie
ban kaibat Yang matul

Bate king meging bie
ning metung at metung;
Karin sidia Na ne
ing mapaling Pugun,

Nung nu’ dapat yugse
ding keta kinapul
king burak kinawe,
melakuan king Daung.

Iti, batas ning bie
king kabang panaun
manatiling mabie,
bakas nang nunung Noe!


Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions