Today's Punto
Today's Punto
Opinion
Minadali ang pag-angkat
By Felix M. Garcia

Feb 27, 2018

NITONG nakaraang Lunes na kung saan
ay halos maghapon kong sinubaybayan
sa TV 11 ang balitaktakan
ng akusasyon at pangangatuwiran

Ng mga solons at sangkot sa pag-angkat
ng ‘Dengvaxia vaccine,’ halata kaagad
na minadali ng DOH ang lahat
kaya humantong sa di mangyari dapat?

Kung saan ang buhay nitong walang malay
nating mag-aaral na nabakunahan
nitong dapat sana’y para proteksyonan
n’yan laban sa Dengue yan pala’y pamatay?

Ilang mag-aaaral na ang pumanaw na
sanhi ng di pa man ‘tested’ na Dengvaxia
ay inangkat na nga umano r’yan basta
ng rehimeng Aquino at kaalyado niya?

Sa pangyayaring ‘yan, di n’yan maialis
kay Juan dela Cruz ang siya ay mag-isip
na may nalagyan sa mga opisyales
nating sa kuwarta ay lubhang matitinik.

Partikular na r’yan ang nakatataas,
na siyang ‘signatory’ at una sa lahat
ng ‘under’ sa kanyang mahalagang basbas,
ang sa partihan ay kumita ng limpak?

Ano’t sila’y naging atat na masyado
sa pag-angkat d’yan ng klaseng gamot na ito
na di pa nga ‘tested’ ay binili nito
nang di lang milyones kundi bilyong piso?

Kung pinag-aralan n’yan munang mabuti
o kaya tiniyak muna sa Sanofi
na ang ‘Dengvaxia vaccine’ nga ay ‘safety,’
disin sana’y walang ganyang pangyayari?

Na may nangamatay nga r’yang mag-aaral
at naghihinagpis na mga magulang,
nang dahil sa grabeng mga kapalpakan
ng rehimeng Aquino’ng dapat managot d’yan

Kasama pati na ang kanyang Kalihim
sa DOH at iba pang magagaling
na kaalyado niyang kumita marahil
diyan sa lintik na ‘Dengvaxia vaccine’.

Sige, magturuan kayo sa isa’t-isa
kung sino r’yan ang pasimuno talaga
o sa transaksyon yan ay tunay ngang kumita
upang ang lahat ng sangkot kasuhan na

At maipakulong kung mapatunayan
na sila-sila ang nagkakutsabahan
sa pag-angkat nitong ‘Dengvaxia’ng naturan,
(na di pala gamot kundi ng ‘pamatay’!)

At kaya inangkat lang marahil nitong
magkasangga sa dating administrasyon,
ya’y dahil na rin sa malaking komisyon
na kikitain sa nasabing transaksyon.

Na hayan, nang dahil sa pagiging ‘corrupt’
at hangaring kumita ng limpak-limpak
(na salapi), nang di nagpagod at sukat,
kapag nagkataon…kulungan ang bagsak

Kung mapatunayan ngang ya’y nagkasala
ng pangungurakot at tunay ngang sila
itong naging sanhi rin at naging mitsa
nang pagkamatay r’yan ng batang iskwela.

At kung saan libu-libo ang magulang
na ineksyunan ang mga anak n’yan
itong ang pangamba ay walang pagsidlan
sa kanilang puso sa pangyayaring ‘yan!



Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions