Today's Punto
Today's Punto
Opinion
Cang Juan a batugan
By Felix M. Garcia

Feb 22, 2018

MATAS NE ing aldo, mecuruc nong’ manuc
Kinutud cung dutung yari nang meyacut;
Y gaindu’t calakian mirinan nong’ dicut,
‘Niang malacac ca pang maniaman a tudtud.

Ding punlang mebagut e la pa mitanam,
Tamnan a lubluban e pa me-aswe man,
Ing panalangin mung grasyang danum uran
Caring pilapil mu mitacas na naman.

Pulu ning palang mu pudpud ne at mispac,
Ding inawad mung pun e mo man atabas,
Pacli no’ ding kilu, gipu no’ ring asyas,
Pati garosa mu sira na palunas.

Biabas mung panayan e pa mababaldug,
Masyas neng sicang mu, tical na ca asbuc;
At neng magbutac ca, keng temaran langut,
E wari cacu ca madalas pasanduc?

Ninu naman rugung e matdas a buksi,
Magbante cang nasi, matda pa ing api?
Paki-uluan dacang dumakit cang Pari,
Mete ne ing date e ca pa minuli.

Ding teman mung mais e la pa mesese,
Tatanam no’ naman ding kecang calele;
Casosiu mung dagis, ding gewa rang sale
Malati lang bagia caring sipuc pale.

Lage ca king dalan, sabug-sabug ca buac,
Seli ra cang sucle wela mia a sucat;
Bitun mung sapatus mesira mung mesias,
E ca pepasayang caring abling gatas.

Ketang misan naman minuli cung balen,
‘Nung lumuat cu” ngacu, “ica nang bala ken”;
Mebalam yang bagia calesa cung seken
Silbag da ring manuc ing ulam at asin!

Detang da ing rasyun, libri pati abias,
Bayu ca mikimut ala na’ing sardinas;
Atin cang panulu, limbag ca pa sugat
Nung e ca me-doctor digsu ca metodas.

‘Ning cacasal cata digsu ca mitauli,
Migising ca pala mag-aalas nuebe;
Nung e pa dinakit y Asyung tininti,
King pamanaya cu mete cu sang dine.

Sicapan mung bagyang ilaco’ calinguan
Ing mecad mana mung bayat a catawan;
Ngeni nung talagang natural mu na yan,
Den mung mete panas cucutcut la naman.

Ding adua mung bitis nung e mo’ ikimut,
Maparalisis ca king pangabaluctut;
Nung iducu mia mu ing masias mung gulut,
atalic mong bagia sintas mung sapatus.

Pigkeran mung dase nung ilucut ke pa
Ecu na alutu itang almusal ta’;
Manuyab mung aldo ‘niang tangaran na’ca
Ticpan meng lupa mu, (ta’ dirine ca pa?)

Diwa neng Gonzalo H. Martin, Jr.
ning Candaba, Pampanga


Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions