Today's Punto
Today's Punto
Opinion
Ing tauling sagakgak
By Felix M. Garcia

Jan 25, 2018

ATANDANAN ku pa…misan, king binyagan
keta king lamesa dakal keng mamangan;
itang makayapag pane ngang manyaman,
maki ema’t paro, babi ampon asana.

Karing makarungut a kekeng kasulu
kayabe la ri Juan, i Kulas at Pedru,
i Juan katulid ke ketang luklukan ku
pililibudtan de ding adwa katau.

Di Kulas at Pedru, busal ning pamangan
apansingan ku lang lihim mikindatan,
sake re linawe maki-kabalduguan
itang alang male atyu king pilatan.

Itang pisimen da, ding dwi ampon butul
king arapa’nang Juan karin da bubuntun,
inya aisip kung bisa lang mag-pusung
ban i Juan lunto yang pikaylian ding mirun.

Ing depat dang iti e na sikasung Juan
at kaya balamu alang nanu na man,
ing depata’na pa, kayari nang mengan
ing siming mitambak lila’na king pinggan.

“O Juan, – nganang Pedru, – keng simi mu abe
pati ing apunan peki-pangan mu ne,”
“Wapin, – nganang Kulas, – dapat kang dumine
karing karungut mu’t karing maki-bale.”

Mekibat ya i Juan: “Obat dumine ku?
Talagang yampang da ing dingutan tamu,
at king siming ini…ipakilala ku
ing tau kung mengan… E ku anting asu.”

“E ku anti kareng aliwang mamangan
kabud talakad la, malinis la pinggan,
uli ning danup da ampon katakawan
pati simi’t butul pekilaklak da ngan.”

Biglang kinalugkug ing ayli’t sagakgak
ilang mengalare di Pedru at Kulas,
ing kapusungan dang matulang belangkas
inyang magbalandra… karela kinablas.

Inya ikong pusung ampon mapamiru
nanu mang daptan yu isipan yu pamu,
pota , mapalyaring ketang eyu balu
iko ing masaklit king gawan yung silu!

Diwa neng Poeta Jose M. Gallardo
Ari ning Parnasong Kapampangan
Candaba, Pampanga


Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions