Today's Punto
Today's Punto
Opinion
Kultura’ng pamyugne mayap
By Felix M. Garcia

Dec 19, 2017

BALAMU kapilan pamu ing kanita
minta ku king State ban abayan ku’ya
ing pangane karing anak ming miasawa,
a nu’ing akalma’na a meging asawa
tau ya karin king Baudette, Minnesota
dane Mauli na ning bansang Canada.

Bistaman ing lugal probinsyang mistula
at alang paniglon kapurit mang saya,
king ‘homesick’ e ku pepaysaul bitasa,
waman king bale ra ikami mung adua
ning sese rang asu ing karin menasa
magdili-dili at magpalakuan kusa.

At keta ing bukud a kakung libangan,
susulat at mamikudtang kawatasan;
ampon artikulo a pampahayagan,
kilub ning aldo-aldo a e sasalanan
parala keng Punto antimong regular
a ‘contributor’ o kolumnista bilang.

Kapamilatan ning ‘Internet’ karin ku
ababalu ampon akakua ing isyu
a pagbasian karing kakung komentaryu
antimong ‘opinion writer’ pin keng diaryu;
(Inya agiang atyu keng sepu ning yatu
ing meto’ dyarista magi yang aktibu.

At e ya mabitin keng pamiparala
niting kontribusyon masipag ya sana
ampon e pabaya keng obligasyu na
a sukat na niting gampanan mausta;
King anti kaniti la makikilala
ding ating malasakit king propesyon da).

Aku, king agia mang kaku e aliwang
tau ing kanakung kapagobra bilang,
lulub ku keng oras at e ku gagawan
biru ing nanu mang sukat kung pagobran,
Inya naman angga ngening salukuyan,
e ku sira record karas keng makanyan.

(At agiang kanitang akasaup na ku
keng ‘bus company’ na ning pangunakan ku,
king pisan kung alang pilatan gewa ku
ing sukat pagobran, a nu’ing posisyun ku,
bilang ‘operation manager,’ at aku
ing bali ‘overseer’ lalu neng alayu)

Makanian ku adle pamanalakaran
agiang e aliwang tau ing abayan
at kapagobra ku – nung inya nu’ku man
mipadpad, pangaras keng kapanintunan
ing kakung serbisyu ku binang pibuburian
uling ning biasa kung makyutus kenu man.

Ing tutu na, agiang kapamilya ke pa
ing inabayan ku ken king Minnesota –
uli ning pasuelduan da’ku ring miasawa
bilang ‘helper’ king ‘wines & liquor store’ da,
tutumbalasanan kung sipag at saka
karagdagan malasakit ing babie ra.

At uli ning ala lang sapat a oras
king aliwang bage a malingun dapat,
aku ing keng solar dang sobra kalualas,
itang balang ‘weekend’ ing kusang mamatpat
dikut keng ‘lawn mower’ a misna king talas,
agiang e ra mistil sabian o parapat.

Angga na king kusa kung pemun karela,
ing bisa na ku sang’ muli, kaku e ra
ikit ing kilub ning alus king pabanua
mesukal ku lub o sinlam mu man lupa;
Kase, ing manuyang ku maganaka ya
at itang anak ku antimurin keta;

(At den king nanu mang bage miyugne la,
bista’t mikanlaut la kulturang mana.!)



Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions