Today's Punto
Today's Punto
Opinion
Luid ya ing Kapampangan!
By Felix M. Garcia

Dec 07, 2017

KENG LUAL ya’yni, tuking Lunes a onse na
a kebaitan ning ‘Aldo ning Pampanga’;
At nu’ ing banuahan a pamagselebra
marapat anti ing sadiang balu ta’na

At ken ding mepili a mig-’Most Outstanding
Kapampangan’ ilang mging sentro niting
okasyun king aldo a mitagulaling
para karen inggil king bitbit dang galing

At nu’ ta’la sukat ipagmaragul den
bilang Capampangan at tune kabalen
a migpursigi ban ing dangal ning balen
miningning yang anti ing maslag a Eden.

At migit king sadia iting Kapampangan
a pemalenan ding Pantas at Mahalan
mipuk ya king pekamatas nang pedestal
pauli ring anak niting mangarangal

Aku, bilang metung karing keyang anak
a miyabe keng pilan banuang milabas,
ing keya bukud kung asuyu at yablas
yamu kabud ining bitbit kung panyulat

Inia dalangin ku ing sana migit pa
king ngeni makule bili ning probinsya,
lalu pang milusuk kapamilatan da
ding mapuring anak nang malugud keya

A kabibilangan ding ken salukuyan
king timun mumugit mipmung kalinisan
at ala dit’mu mang musing a sisimpan
pablasang tapat la keng pamanungkulan.

At iti, king uli ning pekapamuntuk
ken king Kapitolyo ngeni makalukluk,
nung inya marahil ultimung sentimus
karing kualtang balen alang magagauk

Nu’ne pin king kaban-balen la miraras
lalu ring abli ning Capitol keng balas,
at den king serbisyo a pangkomunidad
ampon aliwa pang proyektu ken miras.

At sana antining iting lalawigan
buri ta’yang lalung yangat a kabilian,
pati na ing keya amanu tang’ sisuan
yabe ta’na namang sesen at gambulan

Kapamilatan na ning agiagan ta’la
ding keng Sabi tamu malingap talaga
ban ibie reti ing ganap a suporta
karing talasulat king salitang mana

At nu’ kambe na ning ditak a pinansyal
a ibie rang saup ba’lang makapilual
libru a maliaring abasa ring dakal
at agamit da ring anak a magaral.

King paritak-ditak misane lang ustu
keng makatud at ustung pamangamanu,
makarine ing pagsisti ra ka’tamu
ngening daywan ta’ king sariling amanu.

Anti ing pepalual nang libru kanita
ning DepEd ampon ning metung a maestra,
intasang bayu re pepalimbag ita
e la mengutang karing talagang biasa.

Makanano e la pin mikakatulpak
ding amanu reting ginamit at sukat
king librung kailangan abasa ring anak
ban king katutubung sabi la miyanad.

Sana, keng tutuki e na basta kenu
ipagtiwala ne ning DepEd ing libru
a pang-iskwela ban asiguru tamu,
ing e lalung mate karen ing Amanu

AT SAKA ngeni mu mang kayaldawan na,
a pangatatag ning mal tamung probinsya –
Kapampangan ngan ing pamipakilala,
pati ing mensahi ding kekatang MOKA!

Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions