Today's Punto
Today's Punto
Opinion
Grabeng panlalamang
By Felix M. Garcia

Nov 30, 2017

IWAN MUNA natin at pansamantalang
ibaling ang paksa sa di pulitikal
na isyu, kundi sa temang kalakalan,
na aywan kung tama ang gawa ng ilan.

Tulad halimbawa nitong ilang ‘network’
ng ‘internet,’( Smart, Sun, TM at Globe,)
tama bang oras na tayo ay nagpa-’load,’
may taning na araw na dapat maubos?

Kung saan ginamit natin yan o hindi,
dahil may ‘expiry date,’ ubos palagi
ang ‘load’ natin nang ni walang pasubali,
at hindi rin naman tayo makatanggi?

At ang mas grabe pang panlalamang nila
ay itong kapagka’ may ‘load’ tayong extra
(maliban sa UNLI CALL at saka TEXT pa),
na pinaka-promo ng TM at Globe ba?

Nilalamon din nang kasabay parati
ng extrang ‘load’ natin na pang ‘EXTEND’ bale
nitong masahol pa sa gutom na buwitre
na mga may-ari sa puntong nasabi!

Hindi pa ba sila makuntento riyan
sa bilyones nilang kita araw-araw,
kaya nila nagagawang pagnakawan
ang dapat ay patas nilang pagsilbihan?

Na kahit batid na nating di parehas
ang serbisyo nila’t klaseng pamalakad
ay patuloy pa rin nating niyayakap,
sanhi ng wala ng ibang mahagilap?

Sana itong isa na napabalitang
‘internet provider’ daw na nakatakdang
magtayo rito ng bagay na naturan
na mas mabilis at mura ang singil n’yan.

Sa lalong madaling panahon matupad
upang itong TM, Sun, Globe at ang Smart
ay di na maaring makapayagpag,
kapag nagkarun ng karibal na patas.

Di kagaya ngayong kwenta dalawa lang
ang ‘internet providers’ na naririyan,
dahilan na rin sa itong Smart at Sun
ay kwenta isa lang ang serbisyong bigay;
at ang TM at Globe ay ganun din naman.

Pero katulad nga ng ating sinabi
sa dakong unahan nito ni ‘yours truly,’
kapag natuloy ang plano ni Duterte,
patay ang negosyo ng mga ‘yan pati.

At ang pagkamal n’yan nitong limpak-limpak
na salaping galing sa di nila patas
na panuntunan at tusong pamalakad,
tiyak liliit na pagdating ng oras

Sapagkat anumang bagay na nakamit
sa pamamagitan ng gawaing pangit,
paka-asahang ang bigay na kapalit
ay pagkabigo at parusa ng langit!

Tama’t sa ngayon ay tumatabo sila
ng limpak-limpak na salapi sa tuwina,
bunsod ng diskarteng di patas talaga,
pero hanggang saan sa akala nila?

Hahantong ang kahit ano pa mang bagay
na di sa malinis na pamamaraan
nakamit, kung hindi pagdating ng araw
ay daranas sila ng kapighatian!



Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions