Today's Punto
Today's Punto
Opinion
‘Aku ngeni, bukas ika’
By Felix M. Garcia

Nov 02, 2017

ING DAUN o ‘Undas’ e kapagmasusian
ban magsaya tamu king aldo iti’nan
Nun’e banting misan king pabanua mu man
ding mal king bie akua ta’lang adalawan

At kapamilatan ning asuluan ta’la
ding karelang puntud o pikutkutan da,
Matibe kaustan, kelinguan ali pa
ing karela lugud lugud tamu’t panalala

At nung e tamu man aibie kareti
ing kasuywan tamu niang mabie la reti,
Agiang nen mung Daun a’yanti mo ngeni
adakayan ta’lang panalangin deti

King malumbe puntud a tauling pagsautan
ding king alikabuk muli katataulian,
At nu’ ring kaladua ding meging alipan
ning Ginu mabe la king Keyang karinan

Karas ning panaun o ning takdang oras
tipa yang miuman i Kristo’ng Keyang Anak
Ban atulan iting yatung sobra dawak,
at ding banal ilang maliaring miligtas

King kaparusan a tikda na ning Ginu,
a makadetalye king Banal a Libru,
Ituki na la ring king utus memintu
at ding suail dala na la king Impyernu

Inia mangaintulid mu kaku at keka
ing magbayu ampon yawad tawad Keya
Ing anggang depatan tang’ pamikasala
ban aligtasan ing tikda Nang parusa

At nu’ kabang atin tamu pang sikanan
malino pamisip at e pa salunan,
Ikumpisal tana king Dios a Miglalang
ing anggang arapat tamung kasalanan

Uling nung pota nang lipang ta’na isip
at e na mu naman mikimut unabis,
Karin ta’pamu pin Keya kukulait,
mayna na datang ing kekatamung bosis

At keta maliaring mayna namu naman
ing nanung king Ginu buri tamung sabian,
Inia ing maliari niting kapupuntan
e na miras uling e na’Na damdaman!

POTANG atyu tamu’t daralawan ta’la
king tauling santungan a pekabale ra,
Di Ingkung, di Apu, di Ima at Tata
ampon aliwa pang meko kanita pa.

Dapat tang’ isipan datang ing panahun
ing ika at aku ken ta’murin dulung;
A nu’ keta ating mamako maranun,
at atin mu naman itang gatpanapun

Kalupa ning kakung abasa kanita
king meto’ kutkutan keti king Pampanga,
A nu’ itang makasulat king pasbul na,
antini ya: ‘AKU NGENI, BUKAS IKA!’


Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions