Today's Punto
Today's Punto
Opinion
KGG. CICERO J. PUNSALAN:
Ing abogado at pulitiko
By Felix M. Garcia

Oct 10, 2017

KABUD abalitan kung mete ne ngara
ing mapuring tau, marapal kung minta
king ‘Good Shepherd’ a nu’ ring keyang pamilya
karin de binurul marimlang bangke na

Inyang lapitan ke king keyang kabaung
at atangalan king piblas nang pamburul,
sinagiwa kaku ing makule napun
ning bie na king keyang apiling propesyun

A nu’ marangal na niting pengabiayan
ing mag-abugado ya ampon tinalan
a mialiwang puestung pambalen iti’nan
a gimpanan niting mipmung kalinisan

Bilang abogado, e na gewa niti
ing e meging tapat kenu mang kliyente
a linapit ba’neng ipaglualu iti
keng asunto, kalulu ya mabandi

Nung agyu na muring akua keng areglu
ing nanu mang klasing dimanda o kasu,
e na’na iparas iti king husgadu
ba’na lang e dagul a gastus ding tau.

At agiang nung misan ala yang ibayad
ing ating kasu ken a mabayat-bayat
e maging sumbagal ing kinang ding pilak
ban ing matulid ning tau madakurak.

Bilang pulitiku, makanian mu naman
e papaysilo king maling kalakaran,
inya king nanu mang puestu nang telanan
i Cicero dit’man e ya mimusingan.

Kanitang tagal ya ken king San Fernando
yang karing Konsehal balen memrimeru;
Kaibat niang mate i Mayor Panlilio,
king panga-bise alkalde yang mipuestu.

(Mupin, ing masakit… king pangalukluk na
antimong ‘vice mayor’ pigkalub ali ra
ing ‘recognition’ a mangaintulid kaya
ding atiyu ken king upaya kanita

At nung angga king mepupus ing terminu
na antimong ping Vice Mayor San Fernando
e mirinan pansin uli na siguro
ning sapid ya’t e ya tune Fernandino?)

Tuking tinagal ya i Cicer Punsalan
antimong ‘board member’ o ausan dang bokal,
pasibayu agiang e ya mig- ‘number one’
(ing bait San Simon sinambut ne naman).

At ya kabud karing kayabe nang bokal
king konseho na ning mal tang’ lalawigan
ing alang unabis ‘absent’ o liniban
keng session, ‘on record,’ parating No.1;

Meging Assemblyman ya naman i Cicer,
puera pa king meging Vice Governor ya ken;
mig-Gobernador ya – bayu i Tatang Bren
ning balen Magalang , nung e re kildas den

Di Cory Aquino iniang masambut ya
i Marcos at mika-rebulusyun EDSA,
a nu’ ding Cojuangco i Bren yang likluk da
king Capitol, at i Cicer mepaldak ya.

Bista man kanita ya ing makalukluk
kaibat neng king kasu i Mendoza simbut
king ‘Supreme Court,’ at nung ninung dapat lukluk
bilang Gob, i Cicer o’ing tau Baculud?

(Atin yang kasuglung)



Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions