Today's Punto
Today's Punto
Opinion
‘No one is above the law’
By Felix M. Garcia

Oct 05, 2017

PUEDE bang magtatag si Pangulong Digong
ng anila ay ‘presidential commission’
na mag-imbistiga ng ‘graft & corruption,’
gaya ng plano niya sa Ombudsman ngayon?

Na bagama’t base sa ating Saligang
Batas ito’y isang ahensyang hiwalay
na hindi sakop ng alin pa mang sangay
ng ‘executive, legislative, judicial?’

Maraming abogado ang nagsasabi
na hindi puedeng magtatag si Duterte
at ibang tanggapang nasa ilalim pati
nitong mandato ng ating president.

Pero kung tunay ngang siya ay may sapat
na batayan base sa Saligang Batas,
at mga desisyon na r’yang iginawad
ng Korte Suprema, ya’y maitatatag!

At kung nanaisin ng ating Pangulo
ng isang komisyon na titingin dito
upang ang korapsyon ay masugpo nito,
ang Konstitusyon may basbas sa ganito.

Na puedeng magtatag si Pangulong Digong,
(bilang ‘incumbent’ na presidente ngayon)
ng isang ahensya o kaya komisyon,
para gumawa ng kaukulang aksyon

Upang ang ano pa mang r’yang katiwalian
ng Ombudsman, maging ng Highest Tribunal
ay masawata ng komisyong naturan,
‘in such a way its form and substance is legal’.

Sa pagtatag ng ‘presidential commission’
na puedeng isulong ng administrasyon
base sa Article 7 nitong Section
7; 1987 Konstitusyon.

Na tungkuling moral ng isang Pangulo
ang tiyaking buong katapatan nito
bilang lider, ang di siya patatalo
sa pagpapatupad ng batas na wasto.

At bilang bahagi ng katungkulan niya
ay marapat lang na ipaglaban tuwina
ang tama, sukdulang ang Korte Suprema
o itong Ombudsman ang may anomalya

Tao lamang sila na katulad natin
na posibleng makagawa ng mali rin,
kaya ano’t bilang parte ng tungkulin
ng Pangulo sila’y di puedeng sitahin?

At ipaimbestiga kung kinakailangan
kapag may ‘cloud of doubt’ laban kaninuman
o kahit sa ating kataastaasang
tribuna ng bansa sa kasalukuyan?

Kung pagsamahin ang dalawang bahagi
ng Konstitusyon ay walang pasubali
na si Duterte ang may ‘mandate’ pumuli
ng dapat isulong para patas lagi.

Kasama sa ‘executive power’ nito
ang pag-imbestiga sa kahit kanino,
na inaakalang ‘corrupt,’ maging ito
ay sina Morales at Justice Sereno.

Kaya kahit sila ang nakatataas
na Mahistrado sa ‘ting Saligang Batas,
di ligtas at walang panagutan dapat
sa anumang bagay na uring paglabag!


Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions