Today's Punto
Today's Punto
Opinion
Capampangan, ing indu at amanu
By Felix M. Garcia

Sep 07, 2017

(Kaugne pa murin ning milabas a pamagmasusi ning mal tamung lalawigan para king ‘Aldo ning Amanung Sisuan, iting makatuki a sinulat ning metung a bayung Poetisa Laureadu, ya pamung dinan tamung lugal. ‘Malikwatas’ ing taguri king antiting klasing kawatasan).

O indu ming Capampangan, balen ding pantas at marangal
Beitan ding pipumpunan, Crissot, Yuzon, Macapagal
Manimuna king sintingan, e mitawli karing dakal
Ding watas tang matenakan, atin lugud at pakamal
King amanu tamung sisuan, ginambul, migmasabal

Sukat ta’ pang pagmaragul ing kekatamung kultura
Inyang mibuklat ya’ing pasbul ning crissotan at sarzuela
King talentu e peysaul meging sikat lang artista
Ding kabalen a miukul Dolphy, Rogelio at Vilma
Ila ngeni detang pastul king drama ampon komedya

Capampangan ya ing sabi , paglualu me agiang kenu
Inya ikong bayung suli, luguran ye ing amanu
Mal ya king gintu’t dyamanti, king tagalug, ilokanu
Damdam ko king pakisabi, igulisak yu king yatu
Anting kekayung pengari, e paglibe maski nanu

I kasagsag
O indu ming kapampangan
Beitan ding pipumpunan
Manimuna king sintingan
Ding watas tang matenakan
King amanu tamung sisuan

II kasagsag
Sukat ta’ pang pagmaragul
Inyang mibuklat ya’ing pasbul
King talentu e peysaul
Ding kabalen a miukul
Ila ngeni detang pastul

III kasagsag
Ing Capampangan a sabi
Mal ya king gintu’t dyamanti
Inya ikong bayung suli
Damdam ko king pakisabi
Anting kekayung pengari

IV kasagsag
dai ding pantas at marangal
Crissot,Yuzon,Macapagal
e mitawli karing dakal
atin lugud at pakamal
ginambul, migmasabal

V kasagsag
ing kekatamung kultura
ning crissotan at sarzuela
meging sikat lang artista
Dolphy ,Rogelio at Vilma
king drama ampon komedya

VI kasagsag
paglualu me agiang kenu
king tagalug, ilokanu
luguran ye ing amanu
igulisak yu king yatu
e paglibe maski nanu

Catherine L. Montemayor
a.k.a ‘Babaing Matun’
ning Mexico, Pampanga



Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions