Today's Punto
Today's Punto
Opinion
CRISSOTAN:
(Last part)
By Felix M. Garcia

Aug 31, 2017

LAWEN mo reng manuk a meyaus texas,
Ilang pan-derby ra, paniabung madalas;
Yan naman mo waring gayndung matalastas
Asabitanan deng taring atmu talas?

Babai : Wa, nung karing babi ampon kareng manuk
Malyaring daig ya ing gayndung lulukub;
Karas naman kareng talangka mung kuyug,
Deng lalaki e ro pibuburian lubus.

Antimurin naman karetang papaya
Ding lalaki e la mamungang bitasa;
Inya kemaraylan, tabasan dia’ng bigla
Uli ping kareti ala lang apala!

Iniasa’t lalaki, e mu pagmayabang
Ing ikayu ngamu ing migit kailangan;
Nung e mu kang Eba sabian kung tapatan,
Atin yang anak a linto’y nunung Adan?

Lalaki : Alayu kang Adan o kang nunung Eba
Ing paksang malino dapat pisabian ta’;
Nu’ne ing kutang a nung ninu talaga
Kareting adua ing migit maulaga.

Babai : Lilisia ka pare, king mesabing tema,
King kakung timalad kapapaltan na ka;
Masanting e palak ing isuku mu na
Ing katuliran mung ala namang kwenta!

Lalaki : Ing kaku yang ating malino piakitan,
at e ing pipilit mung alang kamasalan!
Babai : Patugut ka, e mu pipilit kaku yan;
Ding babai ilang migit makailangan!

Lakandiwa : Mitan kayu suging watas ning amanu
Kaniting mapaling pamibadbaran yu,
Ala nang muna keng mipalabas tamu
Ban e ta’ mapintas arapan ding tau.

Masanting siguru ituknan ta’na pa
Ing pamitunggali king mesabing paksa;
At ban maging patas, atul kekong adua
King publiku ta’na lubus panibala.

Maldang pesitagun a ngeni manalbe
Ing kayatulan pu kekayu mi babie;

(Ausan ne pansin ing publiku)

Anti pu kanini… malinawan ke:
Kabud ing waman kung gamat pinatung ke,
King pago na alimbawa ning babai;
Matning palakpakan ing kekatang ibie;

Antimurin nung king watas a lalaki,
Matning palakpak ing ibie ta’ kaniti!

Atulan mu balen, kapamilatan na
Ning singka-katni yung palakpak karela;
At uling piugalian – ing ‘lady’s frist’ ngara,
Tingiran ta’ katni ing kang poetisa!

(Kaibat deng pelakpakan ing babai)
Kaibat, king matikding poeta pu naman
Nung nu’la pu anti yang kekatang lawan;
At ban abalu ta’ ing tune katutuan,
Palakpakan ye nung migit yang kailangan!

(Keni ya mapupus iting Crissotan)





Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions