Today's Punto
Today's Punto
Opinion
Ninan daka wari?
By Felix M. Garcia

Jun 27, 2017

INING pepalual ning kayabe poeta
keng ‘fb’ o ausan tamung social media,
umpisa na pamu nining pinaskil na,
alata ing iti atin yang titema;

At e na aisip king kayang sarili,
ing ya mismu dapat na ing bage iti;
inia keng biling yan ing kakung asabi
“gawa na, kasaman na ning taung ini!”

Idiretsu ku ne kaya ining kutang:
“Ninan daka wari, obat mipakanian
at aisip mu ping keng ‘facebook’ ipalual
ing metung a bage makapanamdaman”?

Yan e maging dalan king ikasaplala
at ikalinang na ning manang Salita,
nu’ne bagkus ita’mismu ing sisira
king matibe buklud ning mal tang’ pigampa.

Banting abasa re ining sinulat mu
ding kapanalig king sisuan tang’ amanu,
wayni ing kalamnan na puntu por puntu
ning keng social media, Abe pinaskil mu.

Verbatim, at maka-nanu pangasulat
makanian kia’ muring keni ku ilikas
ban asuri da ring kekatang kapatad,
nung nanung pake mu king kekang sinulat:

(LALU KARING TAUNG MAGLIDER-LIDERAN
BURING PAMUNTUKAN DING BALANG AGUMAN
DAPOT KATALAN DA E BISANG MAKO MAN
AGIANG MIGLUMUT NO BULDIT KING LUKLUKAN!
AT DING E TUKI KING KARELANG KABURIAN
LALU DING KASAPING BABYE KATULIRAN
AGAD DONG ILAKO AGYANG ALANG SANGKAN
KING BAN MIBALAYUN E USTUNG GAGAWAN!)

King anti kaniti a kekang pigsulit,
a kapilan ku pa pin atyempuan ikit,
malino, ing iti makapanasakit
karing keng aguman ngeni opisyales.

Partikular kaku antimong Pamuntuk
ning AGTACA at kang Pol Batac ning BUKLUD,
inia keng isip ku ing agad sinulud:
“Mariria yamu ing alang utang a lub”.

Kase, nung aku pin ing pataniran mu,
oreni ring keka bukud asabi ku:
“Kaibat daka palang pekiabayan ustu,
abe sukal a lub pa ing apala ku!”

Balu mu ing ika mismu keng biling yan
ing metung ka karing kekang pataniran,
antimong prinsipe at pamuntuk bilang
ning Parnaso na ning Labuad Kapampangan?

Uli ning e ta’ pa man pin mipagbotu
a sukat mo’ sanang mamuntukan tamu
at ken sukat yalal king mialiwang puestu,
bilang Kalihim at saka Sekretaryu.

(Ampon aliwa pa a maging galame
ning aguman tamu a bayung pamiyabe,
a kabibilugan ding meko kang Rene
at ding kekatamu a bayung mekiabe).

Uling kabud-abud ing kekang sarili
yang pepakilala mu ping presidenti,
E ra’ na ka mupin kinuwestyon, king uli
ning keka maragul ming pamanitindi.

(Atin yang kasuglung)


Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions