Today's Punto
Today's Punto
Opinion
Tagumpe kaibat ning lumbe
By Felix M. Garcia

Jun 13, 2017

SALUKUYAN kung painawa lalam nitang punsampaluk,
A nung nu’ ku karin alus patingapun tikdo, lukluk;
Mekabulad, kagnan nitang tatio biglang menulauk,
Ing gaindung manaid sisi aplit nemang migpalpatuk;
At keta apansinan ku dane Pinatubu’ng bunduk,
Itang magpatilo biga, kule abu waring asuk.

Penanandit, anti re mong’ inutyut ing kakung papag
A kanakung pipagkeran neng karin ku makadamag;
Pablasang nung iti e man kasing sikan na katagtag
Ning gidgad ne ing gulut na ning mangamus a damulag,
Ing sikan ning ayun a’yting king sampaluk memalisuag,
Pati salagubang niti digsu megisan menagbag.

Medalumdum at mistulang kapitangan na ning bengi,
King asuk a tekap na ning bulkan, a ngarang sasabi:
Mipagkamua la kanita ning Sinukuan a higanti
At ning karin Pinatubu’ng ausan dang Apu Maliari,
Nung nu’ agpang king leyenda, ining higanting mesabi,
Besibas ne kanu yatang gilingan a gintu ing tauli,

Inia king uli ning mua nang Apu ta’ne inaluke
Ing asbuk ning Pinatubu a maluat nang makaimle;
At keta ing sinulak nang labuk ning bulkan a mebie,
Sikmal na ning engkantado, anggang binit pinakal ne
Ing higanting kasalang na at nu’ pati alang male
Miyagusan king bubusuk dang mapaling pamipate.

E mu ditak a palayan ing keta mengatambunan
King kinusad a mapaling lahar a bigka ning bulkan,
Nung inia ring sibabalen a matindi pangaturan
Pelalung tuknangan deti mikutkut anggang bubungan;
Nung nu’ pati Athenas ning lalawigan, kareti ngan
Ya ing peka-dakal diling balas a mipatan-patan.

Alus meging disiertu ya ing balayan ning Baculud
King lahar a besibas na a keni mibuntun tinud;
At uling yan, nung wari keng bubung bale ing alulud,
Ing danum a ibat babo bunduk ken ngan masasalud,
Nung inia king karakal na ning labuk a ken ngan meniud,
Migit pa nung ikumpara king pekamatas mang bakud.

Dapot iting bultu-bultung lahar a ken mananabu
A manibat king dalisdis na ning bulkan Pinatubu,
Lalam nang pamanungkulan ning bininiag dang Tabaku,
Yan mirinan kapaldanan bista’t iti mebawas mu;
Ing ‘Mega Dike’ makanian deng kanita apikasundu
Banting maging sagkang danum a sobra king kasalusu.

Uli niti, mebawas ing atmung karagul a danum
A keta milalu bilis king marangle tutulandung;
At maging ding sibabalen makalual king tarundun
Niting mesaglawe dike e no’ lalbug misnang dagul,
Pablasang didiretsu na itang danum a durulung
Karing ilug dane Mauli ban king dagat na makiagum.

Ing lahar a indat muran king mababa tatagusgus
Yan e na’na kasing dakal ning kanita maluluslus;
Inia naman ding keraklan a mangalgal na keng nerbius,
Potang den akakit da na itang masalusung agus,
Ngeni e no’ malisuas at e ra balu nung nu’ taglus,
Pablasang king kabilian da ala nong’ tigatig lubus.

Ngeni oyan…uling likas king dai o lipi tamu
Ing tetagan a kakambal tamu bilang Pampanggenyu,
King agia mang itang din’tang kalamidad a masolu,
Yan ikua tang’ akabiusan king lugud ning Apung Ginu;
Inia naman nanu’t e ta’ mamagbalik pasibayu
King lugal a penibatan ngening ala nang peligru?

Arapan ing bayung bukas king solar a nu’ ing bale
Sintungan mu’t tiknangan ku deti ikit tong’ mipase
At mikutkut king lahar a sukad labing limang pie;
Itangad ing panimanman king masayang pamibibie
A mangakung mas malagu ampon masaplalang bie
Uling kaibat ning paliasa, tagumpe kaibat ning lumbe!


Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions