Today's Punto
Today's Punto
Opinion
Balen ko, king Aldo mung Katimawan
By Felix M. Garcia

Jun 01, 2017

BALEN KO, misan pa kakung ilarawan
Ing napun king bie mung mipmung kasakitan,
Lalam dang upaya ding mapanalipan
A keka migtangas ba’ra kang sakupan;
Sablang pibandian mu, ganap dang sekiman
King pemaniapat dang kalapastanganan!
Kulung – karing balang karela salangsang,
Kamatayan para king keka lumbaban.

Kanitang e la pa king Pulu sinanglad
Detang kang Felipe’ng sakim a pamalak,
Keting Indungbalen a nung nu’ laganap
Ing katahimikan king parang mung maslag,
Tiwase la keta’t maligayang ganap
Ding anak nang Eba a’yalang pagsalbat,
Kabang ding kang Adan, atilu king dayat,
Payapang manasik king bie rang panatag.

Dapot itang laya ning balen tang’ irug
Simsam ding Kastilang matuling a buyut;
Kapamilatan na ning segisag dang Krus,
Ikua reng alupig… asilung malambut;
Kaibat ditak-ditak…sikmal da nang lubus
Ing eganaganang disan da na kabud;
Angga na king deti ila nang sinakup
At ganap mig-Ari, linto alang taurs!

I Tarik Soliman na ning Macabebe,
King panlub da reti e ya pepaybande,
At e pepaysupil king bangis dang tagle
Ban ela milub ding e mayap a pake;
At keta teya na itang solu nang bie
Laban king imbut da e kelan marine;
Angga na king iti akua reng apate
King parang ning digma, a nu’ ya mipase!

Itang Lapu-lapu…king Isla ning Mactan,
King panlub da reti meyakit ya tapang;
Uling e na’tanggap ing maging alipan,
Eya pepayraig …pete ne’y Magellan;
Nung e mu ing Misa ampon kabanalan
A keti dela ra antimong panapan;
Itang Sikatuna, king keyang bengisan
E la’gad misaka karing mal tang’ pampang.

Uli ning tepaangan ding liping komanggi,
Dakal lang anak mu a meging bayani;
Pablasang ding biasa tutung e ro’ buri
At ukulan deti ing e ro’ apakli,
Gewa ra… ding balang kekatang kalipi
A keta mig-alsa – pete rong’ piragli;
I Gat Jose Rizal at ding atlung Pari,
Inyang mabite la – milablab ing api!

I Andres Bonifacio ya nang menimuna
Karing Katipunan keng panga-tatag na;
Ding sablang memalen a e na mibata,
Ginisi ra no’ ngan detang Cedula ra!
Kaibat… Balintawak, karin gilisak da
Ing pamakipamuk laban king Espanya!
“Luid ya ing Balayan,” nganing kukulyo ra,
“Ing mate e bala, lalam mung Bandera”!

Ding NOLI at FILI, mitsa lang mistula,
Ketang pamag-alsa a keta migmula;
Ing kasangilan ding sakim a Kastila,
Nyang Nobenta’y sais, mebinyag king daya;
King painut-inut, kanita na mekua
At ganap mebawi ing simsam dang Laya,
King pamisuge rang tepagan at diwa,
Ding anak mung meging bayani ning digma!

(Atin yang kasuglung)


Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions