Today's Punto
Today's Punto
Opinion
Ing mua keng kasiping bale
By Felix M. Garcia

May 18, 2017

MISAN, mikontra ke ning siping ku bale
king e ku na sana pagnasan pang yapse,
Pero uling bala makalalaki ne
mipasawa kung keng panunupaya ke.

E mu pilan besis dinakap nia kabud
karening bibi kung manaid malutub,
Uli ning bagya na kapad ing maglelut
karing e na sese neng kaybat minalut.

At nandin pamu pin uling katmu na ku
king balamu kusa nang pamanabusu,
Dapal keng kinwa ing luyung nang apu ku
ban suguran sana dapot memandal ku.

Uling keng isip ku, king penandit a ita
sinulud bigla ing kasebyan, a ngara:
“Milang ka pang maka-tapulu bayu ka,
gawa king bage a pagsisian mu pota”.

Apisip-isip ku nanu’ing kakung akua,
mikalabkab ku man keng sobra kung kamua,
Aku murin naman ing alang apala
nung mayataki ku at mamangkad bigla.

Depat ku, menintun kung lapis at papil
ing anggang palmura sinulat ku karin;
Kaibat, ing gewa ku silaban kia murin
ban mabe king asuk, itange ning angin!


Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions