Today's Punto
Today's Punto
Opinion
Atlung banuang alang Dios
By Felix M. Garcia

Apr 06, 2017

(Kaugne ning pamagmasusi king pang-pitumpulu’t limang banuang makasalesayan a ‘Araw ng Kagitingan’ o ‘Fall of Bataan’ king gamat ding Hapones inyang a nuebe {9} ya ing Abril 1942, iting poesia a sinulat ning maluka yung talasuyu ya pamung ibie mi bilang maulang panalala para karing kapus- palad a kawal ning lipi a mibual king parang ning gyera).

UME YANG sumiro
karin king Aslagan ing malare Aldo,
A keta miayo
king paritak-ditak king pisak magbabo,
Ing salang mapusyo
a nu’ nandin pamu a mangaling-aldo,
Detang tala babo
at ding batwin karin ilang magparayo;
Tahimik ing galo,
ning dulum ning bengi king kayang panlako,
Dapot melingongo,
‘niang magisi karing din’tang susulapo!

Kagnan ning sabeung
ding balawe bakal king ere luluyun,
Mangatdas ing gabun
karing balang eroplanong tutulandung!
Mikit ing ngulangul,
ing tangis, sambitan ding mikaul-kaul
A keta manintun
matibe kambilan nung nu’ la magkanlung;
Uling balang mugun
ing kalaganapan a sadiang maratun,
Sindak a maragul
king meyalang kalmang inakmul ning dulum!

Ing karin manasik,
a keta mirasan mapaling tilamsik,
E mig-adua isip,
ing keyang araru agad neng pinildis;
At itang pamitik
king kayang Kalakian pitlud na neng pilit,
Saka ne pelantik
banting e mirame king aping lilitik;
Liyus itang lubid
ampo itang paud ing kayang binitbit,
Ta’ ne keta siklit
king kayang awakan ing matalas a kris!

Ding sudsud at lepia
a inalkus deting talibung at pana,
Kanitang ing Laya
kang Felipe la ring keti migpasasa,
Piragli rong’ kinwa
karing datukanan dang baul at takba,
Ban miuman pamingwa
ing Perla ning Asya laban king aliwa,
A sinamsam bigla
king leguan at tindag ning Balen tang’ Mutya;
Nung nu’ itang sabla
sikmal da king pilit ding sakim upaya!

Karakal ding Sisa
a migsunde-sape king pamagdulap da
King meko ligaya
a keta simsam ning masakim a pita
A mas masangil pa
kesa kang Damaso ning Noli kanita;
Migpakasasa la
pati na king puri’t dangalan nang Eba,
Kilub atlung banua,
a’yanti ne waring tikusan talaga,
Ing Perla Malasya
ning Mayupayang Dios a malugud sadya!

(Atin yang kasuglung)



Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions