Today's Punto
Today's Punto
Opinion
Ing tauli kung pamun
By Felix M. Garcia

Mar 07, 2017

(Kaugne ning ‘Order of the Knights of Rizal, Kapampangan Chapter’s “1st Knighthood Ceremony and Induction of Officers,” a merapat king ‘Heroes Hall’ ning Siyudad ning San Fernando, Pampanga inyang a kuatru {4} ya ing bulan ning Marso 2017, ing ‘MI ULTIMO ADIO’a sinulat ning melapupuring bayani ning lipi, Dr. JOSE P.RIZAL, a kepampanganan nang MARVEL V. GARCIA, ya pa mung ibie mi para king malugud yung pamamasa)

MAMUN NA KU sintang beitan cung labuad
masaplalang balen king aldo nang maslag
maligayang Edem cacu memun ganap
at perlas alaya na ning dayat malat.

Yayain ke keca king maglapo tulâ
ing bie cung lanat na, tarus nang mistulâ
yampang keng tibubus ing pangadakilâ
king pangayalipan, mitimawa ca sâ’.

Detang mekidigma king laban mecuput,
ing bie ra keca ra mu naman pagcalub;
era dinian pansin, pibata ing kirut
managumpe la king pintan dang malaut.

Mengabite malda, masangil a sakit
o pamakipamuc a mipnu king nganib
nung ya ing nasa na, pibatan cung pilit
para king balayang, pilsintan cung labis.

Mate cu ngening ing cacung tatangalan
ing cule ning banuang cacu mamatiawan
anti nang pawagang ing aldo malamlam
sunlag ya sumangid ning calat a lulam.

Nung daya’ing buri mu, e naca magdulap
king pangabait mu, ba ca mung mitindag
agiang ken mung metung daya cu ipatac
king malagintu a aslag mung kikislap

Ding capagnasan cung manibat canita
angga na ing cacung isip mimulat ya
magi cang malagung iyas da ring mata
ning macapadurut a dagat alaya.

Maslag naca canuan , ala na ing bacas
ning mapait a luang king mata minatac
mepawi na ing mua, ala nang lingasngas
at ala nang dusta’t, tigatig mang ditac.

King macuyad a bie, nasa cung matutus
ing kecang cayapan lacua’nang tibubus
niting caladua cung ume nang painggulut
camtan mu’ing ligaya, masampat nang lugud.

Migpacabusabus. ica sa’ing mirangal
mie ca sa’ e bala ing bie cu masintang,
matindag mung gabun ing maging cutcutan
banua me ing tacap king cacung pagkeran.

Nung king aldo datang king canacung puntud
atin cang ayalac sampagang macalsut
busal ding masikit a tinubung dicut
uman me iti a canacu pagcalub.

King sanganga na ning lugud mung mayucâ
caring pusung sawi, aclis a malugmâ
bustan mung ing canuan tanggap yang pali sâ
a ticpa’ning gabun king dimlang malucâ.

Busten mung tangara’na cu nitang bulan
ketang sala niting mapusyo’t malamlam
busten mung yatad ning munag king aslagan
ing pilan penandit nang pamamatiawan.

(Atin yang kasuglung)



Other Articles on this Category
DISCLAIMER: Views expressed in this section are those of the readers and do not necessarily reflect the editorial position of punto.com. Punto.com does not knowingly publish false information and may not be held liable for the views of readers exercising their right to free expression.

Before posting any comment, please read our editorial policy. Posts that do not conform to our guidelines will be deleted by the moderator.
COMMENTS
Be the first one to put a comment
Powered by:
TeamSoft Web Solutions