Kasebyan, ding tsuper ‘playboy’ la pin kanu,
Malagad yang bina ing e babaeru;
Aku, king sariling kapaniwalan ku,
Alang matsura na e la mamerwisyu.

Ing e mu masanting karing talasawa,
Ya’ytang mipaburen pati pamilya ra;
Imbes pangabiayan da ne rugu keta,
Miraras mu karing babaing kabit da.

Ding tsuper… king bie ra, pablasa madalas
Laman no’ ning dalan agyang nanung oras,
Deti makanyan lang makabitag agad
Karetang babaing palibut, palakad.

Kasi pin nung iti parati neng sake
King bus o keng dyip nang pamasadang pane,
Pakabitasan mung e binang luat, abe
Manintun ne namang upahan nang bale.

Metung pang ugali ding aliwang tsuper,
Madalas ala lang pirming garahi ren;
Malagad mung tutung atyu kang Kumander,
Lalu pa’t nung e ne sarili ing saken.

Nung tsuper ya keng bus, karaniwan naman
E makagyu ketang atlu mu tatalnan;
Makanano, alus bala nang terminal
Atin yang ‘lover girl’ parating darasan.

Nung tsuper nemang dyip, keraklan kareti
Nung angga mung apat atin yang babai;
Inia rugu’ing saken nung e ne sarili,
Menasa ala yang ibie pang-‘boundary’.

Nung tsuper da ne man ding ausan dang ‘dump truck’
Ding keya… ila ring keng ‘highway’ kabukas,
Inya keraklan ken pati karga rang gas,
Mananap kagnan ning biahi rang balas.

At nung taxi neman ing pamasada na,
Ditak la nung sabyan kung angga lang lima;
Uling kareng Disco, kabaret at kasa
Suki reng parati detang balyerina.

Anti naman keni istrok ding aliwa,
Buri ra ila pang king babai kakua;
Inya rugu agyang lupa yang pindangga
Makusuelu ne yan kesa ketang ala.

Atin namang tsuper a milalu ilig
E ne mamili mang buring maging kabit;
Madalas pati na sadyang ating sabit,
Pakialaman deting pakikalbit-kalbit.

Inya e malaut malyari na kabud
King metung a pugad miyabe lang lumukub,
Nung ing babai na a keta atisud
Kalupa ne bisyu, bubuldit, patusuk.

Nung king bage ninung lalaking mangangas
Mapis o kumet king e kaya’ing mansanas,
Nung e mu pin tutung king mesabing prutas
Y Eba, yang kang Adan manuksu madalas?

Inya e sumala… misan ku pang sabyan,
King uli nang Eba ating mitabakan!
Inya mas masanting … nung bandi neng Julian
Ing kumpareng Pablo, manitindi neman;

At e ne makyabe makisalat-salat
King e keya banting milisya keng kaplas,
Uli ning katutuan a e na la ditak
Ding king anti kanyan tinakman balasbas!!!